వర్షాకాలంలో "పచ్చి పులుసు" ఇలా చేస్తే - టేస్ట్​ గురించి చెప్పడం కాదు, ఆస్వాదించాల్సిందే! - Pachi Pulusu Making Process

Pachi Pulusu Recipe : చాలా మంది ఈ వర్షాకాలంలో వేడి వేడి అన్నంలోకి సాంబార్​, పప్పు చారు, టమాట రసం పోసుకుని తినడానికి ఇష్టపడుతుంటారు. అయితే, ఈ రెసిపీలు చేయాలంటే కాస్త టైమ్​ పడుతుంది. అయితే వీటితో పని లేకుండా.. కేవలం నిమిషాల్లో ప్రిపేర్​ అయ్యే పచ్చిపులుసు చేసుకుంటే.. నా సామిరంగా.. చెప్పడం కాదు, ఆస్వాదించాల్సిందే!

How To Make Pachi Pulusu :వర్షాకాలంలో వాతావరణం పూర్తిగా చల్లగా మారిపోవడంతో కొన్నిసార్లు ఏ కర్రీలతోనూ అన్నం తినాలనిపించదు. అటువంటి సమయంలో చాలా మంది సాంబార్​, పప్పు చారు, టమట రసం వంటి వాటితో తినడానికి ఇష్టపడుతుంటారు. అయితే, ఈ రెసిపీలు చేయాలంటే కాస్త సమయం పడుతుంది. కొన్నిసార్లు వంట చేయడం ఆలస్యమైనప్పుడు ఇవి చేయడం కుదరదు. అయితే, ఇలాంటి సమయం కేవలం పది నిమిషాల్లో రెడీ అయ్యే పచ్చి పులుసు చేసుకుంటే.. టేస్ట్​ అదుర్స్​. కరకరలాడే పచ్చి ఉల్లిపాయ ముక్కలతో.. నోటికి పుల్ల పుల్లని రుచి తగులుతూ ఉండే ఈ పచ్చిపులుసును.. వేడి వేడి అన్నంలో కలుపుకుని తింటే ఉంటది.. నా సామిరంగా అనాల్సిందే! మరి ఈ పచ్చి పులుసును రుచికరంగా ఎలా చేయాలో ఇప్పుడు చూద్దాం.

పచ్చి పులుసు తయారీకి కావాల్సిన పదార్థాలు :

• చింతపండు - 100 గ్రాములు
• పచ్చి మిర్చి - 6
• కొత్తిమీర కొద్దిగా
• పసుపు -అర టీస్పూన్
• జీలకర్ర- టీ స్పూన్
• కరివేపాకు - 4
• ఉల్లిపాయలు- 2
• టమాటా-1
• ఎండు మిర్చి - 4
• రాళ్ల ఉప్పు - రుచికి సరిపడా

సింపుల్​గా పచ్చిపులుసు ఎలా చేయాలంటే :

• ముందుగా స్ట్రెయినర్‌ సహాయంతో సన్నని మంటపై పచ్చిమిర్చిలను దోరగా కాల్చుకోండి. ఇవి వేసి చేస్తే పచ్చిపులుసు చాలా టేస్టీగా ఉంటుంది.
• తర్వాత స్టవ్​ ఆన్​ చేసి పాన్​ పెట్టి కొద్దిగా నూనె వేసి.. టీస్పూన్‌ జీలకర్ర, ఎండుమిర్చి వేసి మంచి సువాసన వచ్చేంత వరకు దోరగా ఫ్రై చేసుకోవాలి.
• కొద్దిగా వేడిగా ఉన్నప్పుడే ఎండుమిర్చి, జీలకర్ర మిశ్రమాన్ని కచ్చాపచ్చాగా దంచుకోండి.
• ఇప్పుడు చిన్న బౌల్లో కాల్చుకున్న పచ్చిమిర్చి, కొత్తిమీర, రుచికి సరిపడా సాల్ట్​ వేసుకుని చేతితోనే మెత్తగా చిదుముకోవాలి.
• అలాగే మరొక పెద్ద గిన్నెలో చింత పండును వేసి అరలీటర్​ నీళ్లు పోసి ఓ పది నిమిషాల సేపు నానబెట్టి.. రసాన్ని తీసుకోవాలి.
• ఇప్పుడు ఆ చింత పండు రసంలో ఉల్లిపాయ ముక్కలను వేసుకోండి. అలాగే కరివేపాకు, సన్నగా కట్‌ చేసిన పచ్చిమిర్చి కూడా వేసి కలుపుకోండి.
• మీకు ఇష్టమైతే చిన్న టమాట ముక్కలను కూడా ఈ పచ్చిపులుసులో వేసుకోవచ్చు.
• తర్వాత ఇందులో పసుపు, పచ్చిమిర్చి కొత్తిమీర మిశ్రమం, ఎండు మిర్చి మిశ్రమం వేసి.. చేతితోనే బాగా మిక్స్​ చేయండి.
• పచ్చిపులుసులోని పదార్థాలన్నింటినీ చేతితో మెదుపుతూ కలపడం వల్ల.. పచ్చి పులుసు ఎంతో రుచిగా ఉంటుంది.
• ఒక్కసారి ఈ వర్షాకాలంలో వేడివేడి అన్నంలోకి కొద్దిగా పచ్చిపులుసు పోసుకుని తిన్నారంటే.. టేస్ట్​ అద్దిరిపోతుంది. నచ్చితే మీరు కూడా ఇంట్లో ఈ రెసిపీని ట్రై చేయండి.

ఇవి కూడా చదవండి :