How To Make Mysore Tomato Rasam: చాలా మంది భోజనంలోకి ఎన్ని కూరలు, వేపుళ్లు ఉన్నా.. కాస్త రసంతో తింటేనే తృప్తిగా ఉంటుందని అంటుంటారు. అందుకే వీలైప్పుడల్లా నిమిషాల్లో తయారయ్యే రసాలను ప్రిపేర్ చేస్తుంటారు. ఇక రసాల్లో టమాట రసం, మిరియాల రసం కచ్చితంగా ఉంటాయి. అయితే, టమాట రసంలో కూడా చాలా రకాలు ఉన్నాయి. ఒక్కో చోట ఒక్కో రుచితో ప్రిపేర్ చేస్తుంటారు. కాబట్టి ఈసారి మీ ఇంట్లో టమాట రసం చేయాలనుకుంటే.. మేము చెప్పే ఈ మైసూర్ స్టైల్లో చేసేయండి. పేరు వినగానే ఏదో అనుకోవద్దు. ఎందుకంటే ఇది చేయడానికి ఎక్కువ టైమ్ పట్టదు. త్వరగానే ప్రిపేర్ అయిపోతుంది. పైగా టేస్ట్ అద్దిరిపోతుంది. ఒక్క ముద్ద తినే దగ్గర మరో రెండు ముద్దలు అదనంగా లాగిస్తారు. మరి ఇంకెందుకు ఆలస్యం మైసూర్ స్టైల్ రసం ఎలా చేయాలో ఓ సారి చూసేయండి!
కావాల్సిన పదార్థాలు :
- కందిపప్పు- నాలుగు టేబుల్ స్పూన్లు
- టమాటలు - 3
- బెల్లం- టేబుల్స్పూన్
- పసుపు - చిటికెడు
- కరివేపాకు-1
- చింతపండు- నిమ్మకాయసైజంత
- పచ్చిమిర్చి - నాలుగు
- నూనె - రెండు చెంచాలు
- ఉప్పు- రుచికి సరిపడా
- కొద్దిగా కొత్తిమీర తరుగు
రసం పొడి కోసం..
- నూనె - 2 టేబుల్ స్పూన్లు
- బ్యాడిగి మిర్చి-3
- పచ్చి శనగపప్పు- టేబుల్స్పూన్
- పచ్చికొబ్బరి- పావుకప్పు
- మిరియాలు- టీస్పూన్
- ధనియాలు- టేబుల్స్పూన్
- జీలకర్ర- అర టీస్పూన్
తాళింపు కోసం..
- నెయ్యి-టేబుల్స్పూన్
- ఎండుమిర్చి-2
- జీలకర్ర-టీస్పూన్
- ఆవాలు-టీస్పూన్
- ఇంగువ- అరటీస్పూన్
టమాటా రసం తయారీ విధానం :
- ముందుగా కందిపప్పును శుభ్రంగా కడిగి కొద్దిసేపు నానబెట్టుకోవాలి. ఆ తర్వాత కందిపప్పును కుక్కర్లో వేసుకుని ముప్పావు కప్పు నీళ్లు యాడ్ చేసి మంటను మీడియం ఫ్లేమ్లో పెట్టి రెండు విజిల్స్ వచ్చే వరకు ఉడికించుకోండి.
- తర్వాత మరో స్టవ్ మీద పాన్ పెట్టి ఆయిల్ పోసి బ్యాడిగి మిర్చి, పచ్చి శనగపప్పు, మిరియాలు, ధనియాలు, జీలకర్ర వేసి దోరగా వేయించుకోవాలి. ఆ తర్వాత పచ్చికొబ్బరి వేసి సన్నని మంట మీద మంచి అరోమా వచ్చేవరకు వేపుకోండి. మీకు మైసూర్ స్టైల్ రసం టేస్ట్ రావాలంటే కచ్చితంగా బ్యాడిగి మిర్చి వాడాలి. ఇవి లేకపోతే ఎండు మిర్చిలను వాడుకోవచ్చు.
- ఇవి చల్లారిన తర్వాత మిక్సీ జార్లో వేసి మెత్తగా గ్రైండ్ చేసుకుని పక్కకు పెట్టుకోవాలి.
- తర్వాత ఓ బౌల్ తీసుకుని అందులోకి కట్ చేసిన టమాట ముక్కలు, కొద్దిగా ఉప్పు, బెల్లం, పసుపు వేసుకుని.. మెత్తగా చిదుముకోవాలి. అంటే టమాటలలోని సారం వచ్చేంత వరకు చేతితోనే మెదుపుకోవాలి.
- అలాగే ఇందులోకి కరివేపాకు, చింత పండు వేసుకుని మరొక సారి మెదుపుకోవాలి.
- ఇప్పుడు ఆ టమాట సారాన్ని ఓ పెద్ద గిన్నెలోకి తీసుకోండి. ఇందులో లీటర్ నీళ్లు పోయండి. అలాగే పచ్చిమిర్చిలు వేసి సన్నని మంట మీద రసం పొంగు వచ్చేంత వరకు మరిగించండి.
- తర్వాత ఉడికించుకున్న పప్పును మూత తీసి మెత్తగా చేసుకుని పక్కకు పెట్టుకోవాలి.
- ఆ తర్వాత మరుగుతున్న రసంలో ఉడికించిన పప్పు, గ్రైండ్ చేసుకున్న మసాలా పొడి వేసి, కొత్తిమీర తరుగు వేసి హై ఫ్లేమ్ మీద మరో నాలుగు నిమిషాలు మరిగించాలి. తర్వాత మంట సిమ్లో పెట్టి రసాన్ని మరిగించుకోవాలి.
- మరోపక్క తాళింపు కోసం స్టవ్ ఆన్ చేసి పాన్ పెట్టి నెయ్యి వేసి ఎండుమిర్చి, ఆవాలు, జీలకర్ర, ఇంగువ, కరివేపాకు వేసి వేయించుకోవాలి.
- ఆ తర్వాత తాళింపును మరుగుతున్న రసంలో వేసి మరో పొంగు వచ్చే వరకు మరిగించుకుంటే.. ఘుమఘములాడే మైసూర్ రసం రెడీ.
- ఒక్కసారి ఈ రసంతో తిన్నారంటే.. రెండు ముద్దలు ఎక్కువే తింటారు. నచ్చితే మీరు కూడా ఈ రసం ట్రై చేయండి.
ఇవి కూడా చదవండి :
అద్దిరిపోయే టమాటా రసం నిమిషాల్లో సిద్ధం - అన్నంలోకే కాదు సూప్లా తాగేయొచ్చు!
చిటికెలో ఘుమఘుమలాడే "వెల్లుల్లి చారు" - సింపుల్గా ఇలా ప్రిపేర్ చేసుకోండి - టేస్ట్ నెక్స్ట్ లెవల్ అంతే! -
