రెండు రోజులకే పచ్చి మిరపకాయలు పాడైపోతున్నాయా? - ఇలా స్టోర్ చేస్తే చాలా రోజులు ఫ్రెష్​గా ఉంటాయ్! - How to Keep Green Chillies Fresh

How to Keep Green Chillies Fresh: మార్కెట్‌కు వెళ్లినప్పుడు చాలా మంది పెద్దమొత్తంలో పచ్చిమిరపకాయలను తీసుకువస్తుంటారు. అయితే కొన్ని రోజులకే అవి పాడైపోతుంటాయి. అలాంటి సమయంలో ఈ చిట్కాలు పాటిస్తే పచ్చిమిరపకాయలు పాడైపోకుండా చాలా రోజులు నిల్వ ఉండి ఫ్రెష్​గా ఉంటాయని నిపుణులు చెబుతున్నారు. అవేంటో ఈ స్టోరీలో తెలుసుకుందాం.

How to Keep Green Chillies Fresh:సాధారణంగా ఎక్కువ శాతం పచ్చిమిర్చి లేకుండా ఏ వంట కూడా చేయలేము. ఎందుకంటే వంట రుచిగా ఉండాలంటే పచ్చిమిర్చి కచ్చితంగా ఉండాల్సిందే. తరచూ షాప్​కు వెళ్లలేక లేదా రేటు తక్కువగా ఉందనే కారణాలతో ఒకేసారి పచ్చిమిర్చిని ఎక్కువగా తెచ్చుకుంటారు. అయితే, కొన్ని రోజులకు పచ్చిమిర్చి కాస్త ఎర్రగా మారిపోయి తాజాదనం కోల్పోవడం, కుళ్లిపోవడం, వాడిపోవడం లాంటివి జరుగుతుంటాయి. ఫ్రిడ్జ్​లో పెట్టినా కూడా ఫ్రెష్​గా ఉండవు. అయితే కొన్ని చిట్కాలు పాటించడం వల్ల పచ్చిమిర్చిని తాజాగా ఉంచుకోవచ్చని నిపుణులు సూచిస్తున్నారు. మరి ఇంకెందుకు లేట్.. ఆ చిట్కాలేంటో తెలుసుకుందాం పదండి.

ఇలాంటివి చూసి కొనాలి:ముఖ్యంగా ముందుగా పచ్చిమిర్చిని కొనుగోలు చేసేటప్పుడు ముడతలు, మచ్చలు లేకుండా తాజాగా ఉన్నవాటిని తీసుకోవాలని సూచిస్తున్నారు. అలాగే పచ్చిమిర్చిని నిల్వ చేసేటప్పుడు తడిగా లేకుండా చూసుకోవాలట. ఎందుకంటే తడిగా ఉన్న మిరపకాయలు ఎక్కువ రోజులు నిల్వ ఉండవని చెబుతున్నారు.

ఎయిర్‌టైట్ కంటెయినర్స్​లో పెట్టాలి:పచ్చిమిరపకాయలను తీసుకురాగానే నీటితో శుభ్రం చేసి ఆరబెట్టాలని చెబుతున్నారు. ఆ తర్వాత వాటి తొడిమలు తీసి.. ఎయిర్ టైట్ కంటెయినర్‌లో పేపర్ ‌టవల్స్ వేసి పెట్టి ఫ్రీజర్‌లో స్టోర్ చేయాలట. ఇలా చేసినవి ఫ్రోజెన్ చిల్లీస్‌లా ఉంటాయని.. వీటిని మనం నెల వరకూ వాడుకోవచ్చని చెబుతున్నారు.

జిప్ లాక్ కవర్​లో పెట్టాలి:పచ్చిమిర్చిని నీటితో చక్కగా కడిగి తర్వాత ఆరబెట్టుకోవాలని చెబుతున్నారు. ఆ తర్వాత వీటిని జిప్‌లాక్ బ్యాగ్‌లో వేసి లోపలి గాలి అంతా పోయేలా చేసి లాక్ చేయాలని సూచించారు. అనంతరం ఈ పచ్చిమిర్చి బ్యాగ్‌ను ఫ్రిజ్‌లో పెడితే చాలా రోజుల వరకూ తాజాగా ఉంటాయని అంటున్నారు.

పాడైపోతే వెంటనే తీసేయాలి:అయితే, ఎలాంటి జాగ్రత్తలు పాటించినా సరే.. కొన్నిసార్లు అందులోని పచ్చిమిరపకాయలు రంగు మారడం, ఆరిపోయినట్టు, పాడైపోయినట్టుగా అవుతుంటాయి. అయితే, వీటిని అలానే ఉంచితే మిగతా పచ్చిమిరపకాయలు కూడా పాడైపోయే అవకాశం ఉంటుంది. అందుకోసమే, ఇలా పాడైపోయిన వాటిని ఎప్పటికప్పుడు తీసేయడం మంచిదని సలహా ఇస్తున్నారు.

పచ్చిమిర్చిని నెలపాటు నిల్వచేయాలంటే?:పచ్చిమిర్చి నెలపాటు పాడైపోకుండా ఉండాలంటే ముందుగా వాటిని శుభ్రంగా కడిగి అందులో కుళ్లిపోయిన మిర్చిని తీసేయ్యాలట. ఆ తర్వాత వీటిని పేపర్ టవల్​పై ఆరబెట్టి.. తొడిమలు తీయాలని చెబుతున్నారు. అనంతరం గాలి చొరబడని డబ్బాలో పేపర్ టవల్ వేసి పైన మిర్చి వేయాలని తెలిపారు. దానిపై మరొక పేపర్ టవల్ వేసి మూతపెట్టి ఫ్రిడ్జ్ లో పెట్టి నిల్వ చేయాలట. ఇలా చేస్తే మిర్చి నెలపాటు పాడవ్వకుండా తాజాగా ఉంటాయని వివరించారు.

మరో విధానం ఏంటంటే.. నీళ్లలో టీ స్పూన్ వెనిగర్ వేయండి. ఈ నీటిలో మిర్చిని వేసి కాసేపు ఉంచండి. ఇప్పుడు నీళ్లతో శుభ్రం చేసి..పేపర్ టవల్ పై ఆరబెట్టండి. ఆ తర్వాత మిర్చి తొడిమలు తీసి.. వాటిలో కుళ్లిపోయిన మిర్చిలను వేరు చేయండి. ఆ తర్వాత జిప్ లాక్ బ్యాగ్, ఎయిర్ టైట్ కంటైనర్​లో పెట్టి ఫ్రిజ్ లో స్టోర్ చేస్తే ఎక్కువ కాలం పాటు తాజాగా ఉంటాయట!