గుంటూర్​ స్పెషల్​ "కోవా మాల్పూరి" - ఈ టిప్స్​ పాటిస్తూ చేస్తే పర్ఫెక్ట్​- పైగా రుచి అద్భుతం!

-పండగ వేళ సరికొత్త స్వీట్​ మాల్పూరి -ఈ కొలతలతో తయారు చేస్తే పర్ఫెక్ట్​ టేస్ట్​

Guntur Special Malpuri Recipe :మిఠాయిలంటే అందరికీ ఇష్టమే. స్వీట్​ బాక్స్​ ముందు పెడితే చాలు.. ఒకటికి రెండుస్వీట్లు తిని మనసు తృప్తి పరుచుకుంటారు. ఇక పండుగలు, శుభకార్యాలు టైమ్​లో ఇంట్లో తప్పకుండా ఏదోకస్వీట్​తయారు చేస్తుంటారు మహిళలు. అయితే, ఇప్పుడు మనం గుంటూర్​లో ఎంతో ఫేమస్​ అయినా "స్పెషల్​ కోవా మాల్పూరి" ఎలా తయారు చేయాలో చూద్దాం. ఇది చేయడం కష్టమనుకుంటారు చాలా మంది. కానీ, ఈ స్టోరీలో చెప్పిన కొన్ని టిప్స్​ పాటిస్తూ.. చేస్తే కోవా మాల్పూరి పర్ఫెక్ట్​గా వస్తుంది. ఈ తీయని కోవా మాల్పూరిలను ఇంట్లో వాళ్లందరూ ఒకటికి రెండు ఎంతో ఇష్టంగా తింటారు. మరి ఇక లేట్​ చేయకుండా గుంటూర్ స్పెషల్​కోవా మాల్పూరి ఎలా చేయాలో ఇప్పుడు చూద్దాం..

కావాల్సిన పదార్థాలు..

పూరీల కోసం..

• గోధుమ పిండి-2 కప్పులు
• మైదా పిండి- అరకప్పు
• నీళ్లు -రెండున్నర కప్పులు

కోవా కోసం..

• పాలు -250 ml
• నెయ్యి - 2 టేబుల్​స్పూన్లు
• పాల పౌడర్​-ఒకటిన్నర కప్పు

పాకం కోసం..

• పంచదార- 2 కప్పులు
• నీళ్లు -కప్పు
• యాలకులపొడి- అరటీస్పూన్​

తయారీ విధానం..

• ముందుగా ముకుడులో నెయ్యి వేసి కరిగించండి. ఇప్పుడు పాలు పోసి ఒక పొంగు వచ్చేంత వరకు మరిగించండి.
• పాలలో కొద్దికొద్దిగా పాల పౌడర్​ వేసుకుంటూ.. బాగా మిక్స్​ చేయండి. (పాల పిండి ఒకేసారి కాకుండా.. 2 లేదా 3 చెంచాల చొప్పున వేసుకుంటూ కలపాలి.)
• కోవా రెడీ అయిన తర్వాత ముకుడులోంచి తీసి పక్కన పెట్టుకోండి.
• ఇప్పుడు పాకం కోసం.. స్టౌపై గిన్నె పెట్టండి. ఇందులో పంచదార, నీళ్లు పోసి కరిగించండి.
• చక్కెర కరిగి పాకం రెడీ అయిన తర్వాత స్టౌ ఆఫ్​ చేయండి. ఇందులో పావు కప్పు పాకం పక్కన ఉంచుకోండి. తర్వాత యాలకులపొడి వేసి బాగా కలపండి.
• ఇప్పుడు పూరీల కోసం మిక్సింగ్​ బౌల్లో గోధుమ పిండి, మైదా పిండి వేసుకుని మిక్స్ చేయండి.
• పిండిని నీళ్లతో ఒకేసారి కాకుండా.. కొద్దికొద్దిగా పోస్తూ బాగా మిక్స్​ చేయండి.
• పిండిలో చివరిగా తీసిన పంచదార పాకం వేసి మిక్స్​ చేయండి. పూరీల పిండి దోశల పిండిలా ఉండాలి.
• ఇప్పుడు స్టౌపై కడాయి పెట్టి పూరీలు వేయించడానికి సరిపడా ఆయిల్ వేయండి.
• నూనె బాగా వేడిగా ఉన్నప్పుడు గరిటెతో పిండిని ఒకేచోట పోయండి.
• ఒక నిమిషం తర్వాత పూరీని గరిటెతో తిప్పి రెండు వైపులా బాగా కాల్చుకోండి. ఈ పూరీని చక్కెర పాకంలో వేసి ఒక నిమిషం తర్వాత ప్లేట్లోకి తీసుకోండి.
• పూరీలలోని పాకం పోయిన తర్వాత.. ఇప్పుడు ఈ పూరీల మధ్యలోకి కోవా స్టఫ్​ చేసుకోండి. అంతే ఇలా సింపుల్​గా చేసుకుంటే ఎంతో రుచికరమైన గుంటూర్​ మాల్పూరి మీ ఇంట్లోనే తయారైపోతుంది.
• నచ్చితే ఈ పండగకు ఈ మాల్పూరి తప్పక ట్రై చేయండి.