How to Make Moong Dal Halwa in Telugu : దీపావళి అంటే ముందుగా గుర్తొచ్చేది టపాసులు, మిఠాయిలే. ఈ క్రమంలోనే చాలా మంది ఇంట్లో రకరకాల స్వీట్ రెసిపీలు ప్రిపేర్ చేసుకుంటుంటారు. అలాంటి వారికోసం ఈ పండగ(Diwali 2024) వేళ ఒక కొత్త స్వీట్ రెసిపీ తీసుకొచ్చాం. అదే "పెసరపప్పు హల్వా". ఇది చాలా రుచికరంగా ఉండి తింటుంటే తినాలనిపిస్తుంది. పైగా దీన్ని ప్రిపేర్ చేసుకోవడం కూడా చాలా ఈజీ! ఇంతకీ.. ఈ హల్వా తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- పెసరపప్పు - 1 కప్పు(200 గ్రాములు)
- నెయ్యి - 1 కప్పు
- జీడిపప్పు పలుకులు - 2 టేబుల్ స్పూన్లు
- కిస్మిస్ - 1 టేబుల్ స్పూన్
- బొంబాయి రవ్వ - 1 టేబుల్ స్పూన్
- బాదం పలుకులు - కొన్ని(కట్ చేసుకున్నవి)
షుగర్ సిరప్ కోసం :
- చక్కెర - 1 కప్పు(200 గ్రాములు)
- వాటర్ - అర కప్పు
- కుంకుమ పువ్వు - చిటికెడు
- యాలకుల పొడి - అర టీస్పూన్
నోట్లో వేస్తే కరిగిపోయే "కమ్మని కలాకండ్" - ఇలా చేస్తే అచ్చం స్వీట్ షాప్ టేస్ట్!
తయారీ విధానం :
- ఇందుకోసం ముందుగా ఒక బౌల్లో పెసరపప్పును తీసుకొని శుభ్రంగా కడిగి 3 నుంచి 4 గంటలపాటు నానబెట్టుకోవాలి.
- అనంతరం పప్పులోని నీళ్లను వడకట్టి మిక్సీ జార్లోకి తీసుకుని అవసరమైతే కొద్దిగా వాటర్ యాడ్ చేసుకొని మెత్తగా గ్రైండ్ చేసుకొని పక్కన ఉంచుకోవాలి.
- ఇప్పుడు రెసిపీలోకి కావాల్సిన షుగర్ సిరప్ ప్రిపేర్ చేసుకోవాలి. ఇందుకోసం స్టౌపై పాన్ పెట్టుకొని చక్కెర, వాటర్ వేసుకొని పంచదార మొత్తం కరిగే వరకు మరిగించుకోవాలి.
- చక్కెర పూర్తిగా కరిగాక.. అందులో కుంకుమ పువ్వు, యాలకుల పొడి వేసుకొని కలుపుతూ 1 నుంచి 2 నిమిషాల పాటు మరిగించుకున్నాక పాన్ని దింపి పక్కన పెట్టుకోవాలి.
- ఇప్పుడు స్టౌపై మరో పాన్ పెట్టుకొని అర కప్పు నెయ్యి వేసుకోవాలి. నెయ్యి కరిగి బాగా వేడయ్యాక జీడిపప్పు పలుకులు, కిస్మిస్ వేసుకొని బాగా ఫ్రై చేసుకోవాలి. ఆపై వాటిని ఒక ప్లేట్లోకి తీసుకుని పక్కన ఉంచుకోవాలి.
- అనంతరం అదే పాన్లో బొంబాయి రవ్వ వేసుకొని 1 నుంచి 2 నిమిషాల పాటు కలుపుతూ ఫ్రై చేసుకోవాలి.
- అది వేగిన తర్వాత స్టౌను లో ఫ్లేమ్లో ఉంచి అందులో ముందుగా మిక్సీ పట్టుకున్న పెసపప్పు పేస్ట్ని వేసుకొని ఉండలు కట్టకుండా గరిటెతో కదుపుతూ బాగా వేయించుకోవాలి.
- ఆవిధంగా వేయించుకునేటప్పుడే మిగిలిన అరకప్పు నెయ్యిని కూడా కొద్దికొద్దిగా వేసుకుంటూ ఫ్రై చేసుకోవాలి. మిశ్రమం నుంచి నెయ్యి సెపరేట్ అయ్యేంత వరకు బాగా వేయించుకోవాలి. ఇందుకోసం 12 నుంచి 15 నిమిషాల వరకు టైమ్ పట్టొచ్చు.
- అలా వేయించుకున్నాక.. అందులో ముందుగా ప్రిపేర్ చేసుకున్న షుగర్ సిరప్ యాడ్ చేసుకొని కలిపి మీడియం ఫ్లేమ్ మీద మరో రెండు నిమిషాల పాటు ఉడికించుకోవాలి.
- ఇక చివరగా ఫ్రై చేసుకున్న జీడిపప్పు పలుకులు, కిస్మిస్తో పాటు కట్ చేసుకున్న బాదం పలుకులు వేసి ఒకసారి బాగా కలిపి సర్వ్ చేసుకుంటే చాలు. అంతే.. ఎంతో రుచికరంగా ఉండే కమ్మని "పెసరపప్పు హల్వా" రెడీ!
ఇంట్లో పాలు, పంచదార ఉంటే చాలు- ఎంతో రుచికరమైన "పాలకోవా" ఈజీగా చేసుకోవచ్చు!
