చలికాలం ఇలా "వాము చారు" చేసుకోండి - జలుబు, దగ్గు, జీర్ణ సమస్యలు ఔట్!

చలికాలం జలుబు, దగ్గు వేధిస్తుంటే - ఘాటుగా "వాము చారు"ని ప్రిపేర్ చేసుకోండిలా!

Ajwain Rasam Recipe in Telugu :చలికాలం చాలా మందిని రకరకాల ఆరోగ్య సమస్యలు వేధిస్తుంటాయి. అందులో ప్రధానంగా జలుబు, దగ్గు, జీర్ణ సమస్యలు ఎక్కువగా ఇబ్బందిపెడుతుంటాయి. అయితే, అలాంటి టైమ్​లో ఎన్నో ఔషధ గుణాలు కలిగిన వాముతో ఇలా చారుని ప్రిపేర్ చేసుకుని తింటే మంచి ఫలితం ఉంటుంది! ముఖ్యంగా నాన్​వెజ్ తిన్నాక ఆఖర్లో ఈ చారుతో ముగించారంటే తిన్న ఆహారం ఈజీగా జీర్ణమవ్వడమే కాకుండా శరీరం కూడా తేలిక పడుతుందట.

అలాగే, వాము చారుని తినడం ద్వారా జలుబు, దగ్గు, వికారం వంటి సమస్యల నుంచి మంచి ఉపశమనం లభిస్తుందంటున్నారు నిపుణులు. పైగా ఈ చారు తయారీ కోసం ఎక్కువ సమయం కేటాయించాల్సిన పని లేదు. చాలా తక్కువ సమయంలో ఈ చారుని తయారు చేసుకోవచ్చు. మరి, ఈ హెల్దీ అండ్ టేస్టీ వాము చారుకి కావాల్సిన పదార్థాలేంటి? తయారీ విధానం ఏంటో ఇప్పుడు చూద్దాం.

కావాల్సిన పదార్థాలు :

వాము పొడి కోసం :

• వాము - 1 టీస్పూన్
• ఎండుమిర్చి - 2
• ధనియాలు - 1 టీస్పూన్
• జీలకర్ర - అరటీస్పూన్

చారు కోసం :

• ఆయిల్ - 1 టీస్పూన్
• మెంతులు - అరటీస్పూన్
• ఆవాలు - అరటీస్పూన్
• జీలకర్ర - అరటీస్పూన్
• వెల్లుల్లి రెబ్బలు - 4
• ఎండుమిర్చి - 1
• పచ్చిమిర్చి - 2
• చింతపండు - నిమ్మకాయ సైజంత
• పసుపు - పావు టీస్పూన్
• రాళ్ల ఉప్పు - రుచికి సరిపడా
• కరివేపాకు - 2 రెమ్మలు

తయారీ విధానం :

• ఇందుకోసం ముందుగా మిక్సీ జార్ తీసుకొని అందులో వాము, ఎండుమిర్చి, ధనియాలు, జీలకర్ర వేసి మెత్తని పొడిలా గ్రైండ్ చేసుకొని పక్కన ఉంచుకోవాలి.
• ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె కాస్త వేడయ్యాక ఆవాలు, మెంతులు వేసుకొని వేయించుకోవాలి. అవి వేగాక జీలకర్ర, క్రష్ చేసుకున్న వెల్లుల్లిరెబ్బలు, ఎండుమిర్చిని వేసుకొని మరికాసేపు ఫ్రై చేసుకోవాలి.
• ఆ తర్వాత పచ్చిమిర్చి, నిమ్మకాయ సైజంత చింతపండు నుంచి తీసిన 250ఎంఎల్ చింతపండు రసం, పసుపు, రాళ్ల ఉప్పు, కరివేపాకు వేసుకొని ఒకసారి బాగా కలుపుకోవాలి.
• అనంతరం 250ఎంఎల్ వాటర్, ముందుగా గ్రైండ్ చేసి పెట్టుకున్న వాము పొడి వేసుకొని కలిపి మీడియం ఫ్లేమ్ మీద 10 నిమిషాల పాటు మరిగించుకోవాలి.
• ఆ తర్వాత స్టౌ ఆఫ్ చేసుకొని వేడివేడిగా సర్వ్ చేసుకుంటే చాలు. అంతే, ఎంతో టేస్టీగా ఉండే ఘుమఘుమలాడే "వాము చారు" రెడీ!
• దీన్ని వేడివేడిగా అన్నంలో పోసుకుని తినడమే కాకుండా నేరుగానూ తాగేయొచ్చు. అంత రుచికరంగా ఉంటుంది ఈ చారు. మరి, నచ్చితే మీరూ ఓసారి ఈ రెసిపీని ట్రై చేయండి.

ఇవీ చదవండి :