Best Tips to Reduce Belly Fat : ప్రస్తుత రోజుల్లో మారిన జీవనశైలి, ఆహారపు అలవాట్ల కారణంగా పొట్ట చుట్టూ కొవ్వు పేరుకుపోయి లావుగా కనిపిస్తుంటారు. అలాగే, శరీరంలో హార్మోన్ల అసమతుల్యత తలెత్తినా, ఒత్తిడితోసతమతమైనా, డెలివరీ తర్వాత.. ఇలా వివిధ సందర్భాలలో పొట్ట పెరిగిపోవడం మన గమనిస్తూనే ఉంటాం. వాస్తవానికి ఇలా పెరిగిపోయిన పొట్టంటే ఎవరికీ నచ్చదు.
ఈ క్రమంలోనే చాలా మంది వెంటనే దీన్ని తగ్గించుకొని తిరిగి నాజూకైన నడుమును సొంతం చేసుకోవాలని వివిధ ప్రయత్నాలు చేస్తుంటారు. కానీ, కొందరిలో ఎన్ని ప్రయత్నాలు చేసినా ఫలితం అంతంతమాత్రంగానే కనిపిస్తుంది. అలాకాకుండా మీకు వచ్చిన బెల్లీ ఫ్యాట్ రకాన్ని బట్టి కొన్ని టిప్స్ పాటిస్తే ఎలాంటి పొట్టనైనా ఈజీగా తగ్గించుకోవచ్చని సూచిస్తున్నారు నిపుణులు. ఇంతకీ, ఆ టిప్స్ ఏంటో ఈ స్టోరీలో తెలుసుకుందాం.
డెలివరీ తర్వాత పొట్టను ఇలా తగ్గించుకోండి!
చాలా మంది మహిళల్లో డెలివరీ అయిన తర్వాత కూడా పొట్ట కాస్త ఎత్తుగానే కనిపిస్తుంటుంది. దీంతో అసౌకర్యంగా ఫీలవుతుంటారు. ఈ క్రమంలోనే వెనువెంటనే పొట్ట తగ్గించుకొని తిరిగి నాజూగ్గా మారాలని ఏవేవో ప్రయత్నాలు చేస్తుంటారు. అలాకాకుండా జీవనశైలి, ఆహారపుటలవాట్లలో ఈ మార్పులు చేసుకుంటే కొన్ని రోజుల్లోనే మార్పు గమనించవచ్చంటున్నారు డాక్టర్ టి. లక్ష్మీకాంత్.
డెలివరీ అయ్యాక ఆరు నుంచి ఎనిమిది వారాల తర్వాత గైనకాలజిస్ట్‌ సలహా మేరకు చిన్న చిన్న వ్యాయామాలు స్టార్ట్ చేయొచ్చు. ఈ క్రమంలో వాకింగ్, పాప లేదా బాబుని ఎత్తుకొని కాసేపు అటూ ఇటూ నడవడం, ధ్యానం, యోగా.. ఇలా కుట్లపై ఒత్తిడి పడని ఎక్సర్సైజెస్ ప్రాక్టీస్ చేయొచ్చు. అదేవిధంగా కీగల్‌ వ్యాయామాలూ వదులైన చర్మం బిగుతుగా మారడానికి దోహదం చేస్తాయంటున్నారు. ఇక ఫుడ్ విషయానికొస్తే.. నట్స్‌, డ్రైఫ్రూట్స్‌, ఆలివ్‌ నూనె, అవకాడో వంటి మంచి కొవ్వుల్ని డైట్లో ఉండేలా ప్లాన్ చేసుకోవాలి. అంతేకాకుండా నిపుణుల సలహా మేరకు పోస్ట్‌ పార్టమ్‌ స్లిమ్మింగ్‌ బెల్ట్‌, చీర చుట్టుకోవడం వంటివి ప్రయత్నించచ్చని సూచిస్తున్నారు.
అలా వచ్చే బెల్లీ ఫ్యాట్ను ఇలా తగ్గించుకోండి!
కొందరికి శరీర పైభాగం స్లిమ్‌గా ఉండి.. పొట్ట దగ్గరికొచ్చేసరికి కాస్త లావుగా కనిపిస్తుంది. ఇందుకు రెండు కారణాలు ఉండవచ్చంటున్నారు డాక్టర్ టి. లక్ష్మీకాంత్. అందులో మొదటిది ఎక్కువసేపు కూర్చొని పనిచేయడం, తగిన శారీరక శ్రమ లేకపోవడం, జంక్‌ఫుడ్‌-ప్రాసెస్డ్‌ ఫుడ్‌కు అలవాటు పడడం వంటి వాటి వల్ల పొట్ట చుట్టూ కొవ్వులు పేరుకుపోయి బెల్లీ ఫ్యాట్ఏర్పడుతుందంటున్నారు. ఇక రెండో కారణమేంటంటే జీర్ణ సంబంధిత సమస్యలు, గ్యాస్ట్రిక్‌ సమస్యల వల్ల ఎప్పుడు చూసినా పొట్ట ఉబ్బరంగా కనిపిస్తుందంటున్నారు.
ఇలాంటి పొట్టను తగ్గించుకోవడానికి ఆహారపు అలవాట్లు, జీవనశైలిలో ఈ మార్పులు చేసుకోవాలంటున్నారు సర్జికల్ గ్యాస్ట్రోఎంటరాలజిస్ట్ డాక్టర్ టి. లక్ష్మీకాంత్. అందులో ముఖ్యంగా డైలీ డైట్లో పీచు అధికంగా ఉండే బీన్స్‌, అవకాడో, బెర్రీ పండ్లు, బ్రకలీ, యాపిల్‌, తృణధాన్యాలు, డ్రైఫ్రూట్స్‌ వంటివి ఎక్కువగా ఉండేలా చూసుకోవాలంటున్నారు.