Ayurvedic Medicine for Lower Back Pain :ప్రస్తుత కాలంలో చాలా మంది నడుము నొప్పితో బాధపడుతున్నారు. చిన్న వయసులోనే బ్యాక్ పెయిన్ రావడానికి చాలా కారణాలుంటాయి. ముఖ్యంగా ఎక్కువసేపు ఒకే దగ్గర కూర్చోవడం, అధిక సమయం డ్రైవింగ్ చేయడం, పోషకాహార లోపం వంటివి ప్రధానమైనవి. అయితే, నడుము నొప్పి తగ్గడానికి ఎక్కువ మంది పెయిన్ బామ్స్, పెయిన్ కిల్లర్స్ ఉపయోగిస్తుంటారు. వీటివల్ల తాత్కాలికంగా మాత్రమే ఉపశమనం లభిస్తుంది. అయితే, నడుము నొప్పి తగ్గడానికి ఒక ఔషధం బాగా పని చేస్తుందని ఆయుర్వేద నిపుణులు డాక్టర్ గాయత్రీ దేవీ చెబుతున్నారు. మరి ఈ ఔషధాన్ని ఎలా తయారు చేసుకోవాలో ఇప్పుడు చూద్దాం.
ఔషధం తయారీకి కావాల్సిన పదార్థాలు..
- శుద్ద గుగ్గులు
- వావిల ఆకులు
- అశ్వగంధ
- దుంపరాష్ట్రం
ప్రయోజనాలు:
శుద్ద గుగ్గులు:బ్యాక్ పెయిన్ తగ్గడానికి శుద్ధ గుగ్గులు బాగా ఉపయోగపడతాయి. ముఖ్యంగా ఇవి జాయింట్ పెయిన్స్ తగ్గించేలా చేస్తాయి. బయట మార్కెట్లో మనకు శుద్ధ గుగ్గులు దొరుకుతాయి. వీటిని శుద్ధి చేసిన తర్వాత చూర్ణం చేసుకోవాలి.
వావిల ఆకులు: వాత దోషాన్ని తగ్గించడానికి వావిల ఆకుల మూలికలు చక్కగా పని చేస్తాయి. వావిల ఆకులను ఎండబెట్టి పొడి చేసుకోవాలి.
అశ్వగంధ చూర్ణం :అశ్వగంధ కూడా వాత దోషాన్ని తగ్గిస్తుంది. దీనిద్వారా నొప్పులన్నీ తగ్గిపోతాయని అంటున్నారు.
దుంపరాష్ట్రం :కీళ్ల నొప్పులు తగ్గడానికి దుంపరాష్ట్రం బాగా ఉపయోగపడుతుందని చెబుతున్నారు. అలాగే వెన్ను పూసల మధ్యలో నొప్పి ఉన్నాకూడా తగ్గుతుందని అంటున్నారు. దుంపరాష్ట్రం కూడా చూర్ణం సిద్ధం చేసుకోవాలి.
తయారీ విధానం:ఇప్పుడు ఒక బౌల్లోకి శుద్ద గుగ్గుల చూర్ణం, వావిల ఆకుల, అశ్వగంధ చూర్ణం, దుంపరాష్ట్రం చూర్ణం అన్నింటినీ ఒక్కోటి 50 గ్రాముల పరిమాణంలో తీసుకోవాలి. వీటిని బాగా కలుపుకోవాలి. ఈ పొడిని మనం గాజు సీసాలో స్టోర్ చేసుకోవాలి. ఇప్పుడు మనం ఔషధం తయారీ విధానం చూద్దాం..
- ముందుగా స్టౌపై గిన్నె పెట్టి గ్లాసు నీళ్లు పోసుకుని వేడి చేసుకోవాలి.
- నీరు మరుగుతున్న సమయంలో ముందుగా కలుపుకున్న చూర్ణాల మిశ్రమాన్ని ఒక చెంచా వేసి కలుపుకోవాలి.
- స్టౌ మీడియం ఫ్లేమ్లో పెట్టి కషాయం.. సగం నీరు ఇగిరేంత వరకు కాచుకోవాలి..
- కషాయం సగం ఇంకితే ఔషధం తయారైపోయినట్లే..
- ఇప్పుడు ఈ కషాయాన్ని వడబోసి.. గోరు వెచ్చగా ఉన్నప్పుడు తాగాలి.
ఈ కాషాయం ఎప్పుడు ? ఎంత పరిమాణంలో తాగాలి ?:నడుము నొప్పితో బాధపడేవారు ఉదయం, సాయంత్రం ఒకసారి ఈ కషాయం తాగాలి. 30-40 మిల్లీలీటర్ల కషాయం తీసుకోవాలని డాక్టర్ గాయత్రీ దేవీ సూచిస్తున్నారు.
NOTE :ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవి కూడా చదవండి :
కఫం పేరుకుపోయి ఇబ్బందిపడుతున్నారా? - ఈ ఫుడ్ తింటే మంచిదట!
సన్నగా ఉన్నామని ఫీలైపోతున్నారా? - ఆయుర్వేద నిపుణులు ఈ పథ్యాహారం సూచిస్తున్నారు!
