Vishwak Sen Gangs Of Godavari:విశ్వక్ సేన్ నటించిన 'గ్యాంగ్స్ ఆఫ్ గోదావరి' సడెన్గా పోస్ట్పోన్ చేయడం వల్ల ఇండస్ట్రీ వర్గాల్లోని పలు సినిమాల విడుదల విషయంలో సందిగ్ధం నెలకొంది. వాస్తవానికి గతేడాది డిసెంబర్ నుంచి అదిగో ఇదిగో అంటూ 2024 మే 17కి రిలీజ్ డేట్ ఫిక్స్ చేసుకున్న ఈ విలేజ్ డ్రామా ఇప్పుడు ఆ తేదీ నుంచి కూడా డ్రాప్ అయ్యింది. ఈ సినిమా మే 31కు షిఫ్ట్ అయినట్లు చెప్పి మరో ఐదుగురు హీరోలకు షాక్ ఇచ్చింది.
మే 17న ఈ సినిమా వచ్చేసి ఉంటే ఎన్నికల మూడ్ నుంచి కాస్త బయటికి వచ్చిన ప్రేక్షకులు థియేటర్లకు వెళ్లేవారేమో. కానీ, ఈ అనూహ్య నిర్ణయం వల్ల ఇప్పుడా పరిస్థితి లేదు. పైగా మే 31పై కర్చీఫ్ వేసుకున్న మరో ఐదుగురు హీరోలకు ఇబ్బంది పడే పరిస్థితి తలెత్తినట్టు అయింది. దీంతో ఈ ఐదుగురిలో కచ్చితంగా ఇద్దరు లేదా ముగ్గురు తప్పుకోవాల్సిందే అనిపిస్తోంది.
సూపర్ స్టార్ కృష్ణ ఫ్యామిలీ నుంచి వచ్చిన సుధీర్ బాబు ప్రస్తుతం హీరోగా నిలదొక్కుకునేందుకు ఇబ్బందులు ఎదుర్కొంటున్నారు. ఆయన నటించిన లేటెస్ట్ మూవీ 'హరోంహర'. ఈ సినిమా మే31న డేట్ కన్ఫామ్ చేసుకుంది. జ్ఞాన సాగర్ దర్శకత్వం వహించిన ఈ విలేజ్ గ్యాంగ్ స్టర్ డ్రామాపై ట్రైలర్తో కాస్త అంచనాలను పెంచింది. వరుస ఫ్లాపులతో సతమతమవుతున్న సుధీర్ బాబుకు కూడా ఈ సినిమా సక్సెస్ అవ్వడం ఎంతో కీలకం.