Tollywood Heros Upcoming Projects : టాలీవుడ్లో ఎంతో మంది స్టార్స్ ఇప్పుడు వరుస సినిమాలతో బిజీగా ఉన్నారు. అందులో కొంత మంది ఇప్పటికే చేతినిండా సినిమాల షూటింగులతో సందడి చేస్తున్నారు. ప్రస్తుతం తెలుగులో చిరంజీవి, బాలకృష్ణ, నాగార్జున లాంటి బడా హీరోలు తమ సినిమా అప్డేట్స్ ఇచ్చి ఫ్యాన్స్ను ఉత్తేజ పరచగా, యంగ్ హీరోలైన నాని, నాగ చైతన్య కూడా తమ కొత్త చిత్రాల గురించి అభిమానులతో పంచుకుంటున్నారు. అయితే ఇప్పటికీ తెలుగులో పలువురు హీరోల సినిమాల విషయంలో సందిగ్ధత కొనసాగుతూనే ఉంది. దీంతో వాళ్ల కొత్త సినిమాల విశేషాలేంటి? ఎప్పట్నుంచి సెట్స్‌లోకి అడుగు పెడతారన్న అంశాలు ప్రేక్షకుల్లో ఆసక్తి రేకెత్తిస్తోంది.
'విరూపాక్ష', 'బ్రో' సినిమాలతో గతేడాది బాక్సాఫీస్ ముందు జోరు చూపించారు యంగ్ హీరో సాయిధరమ్ తేజ్. అయితే ఆ తర్వాత ఆయన అప్కమింగ్ మూవీస్ గురించి ఎటువంటి అప్డేట్ రాలేదు. తాజాగా సంపత్‌ నంది తెరకెక్కించనున్న 'గాంజా శంకర్‌' సినిమాలో తేజు లీడ్ రోల్ అన్నప్పటికీ ఈ సినిమా విషయంలో అనేక సందిగ్ధతలు నెలకొన్నాయి. టైటిల్ నుంచి గాంజా అన్న పదాన్ని తొలగించాలంటూ నోటీసులు కూడా వచ్చాయి. అయితే ఈ సినిమా విషయంలో ఇప్పటి వరకు సరైన అప్డేట్ రాలేదు.మరోవైపు తేజు కోసం కిషోర్‌ తిరుమల 'చిత్రలహరి 2' స్క్రిప్ట్‌ను సిద్ధం చేస్తున్నట్లు నెట్టింట టాక్ నడుస్తోంది.
ఇక యంగ్ హీరో అక్కినేని అఖిల్ మూవీస్ విషయంలోనూ ఇదే సస్పెన్స్‌ కొనసాగుతోంది. గతేడాది విడుదైన 'ఏజెంట్' సినిమా ఆశించిన స్థాయిలో ఫలితాన్ని ఇవ్వలేకపోయింది. దీంతో ప్రస్తుతం అఖిల్ కథల ఎంపికలో కాస్త జాగ్రత్త పడుతున్నట్లు తెలుస్తోంది. అందుకే 'ఏజెంట్' వచ్చి ఏడాది పూర్తి కావొస్తున్నా కూడా ఇంకా తన అప్కమింగ్ మూవీస్ విషయంలో క్లారిటీ రావట్లేదు. అయితే యూవీ క్రియేషన్స్‌లో అనిల్‌ కుమార్‌ అనే కొత్త డైరెక్టర్తో అఖిల్ ఓ సినిమా చేయనున్నట్లు సమచారం.
మెగా వారసుడైన వైష్ణవ్ తేజ్ కూడా తన అప్కమింగ్ మూవీస్ విషయంలో సైలెంట్గానే ఉన్నారు. 'ఉప్పెన' సినిమాతో అభిమానులను ఆకట్టుకున్న ఈ స్టార్ హీరో, ఆ తర్వాత 'కొండపొలం' చిత్రంతో విమర్శకుల ప్రశంసలు దక్కించుకున్నారు. అయితే ఇటీవలే వచ్చిన 'రంగ రంగ వైభవంగా', 'ఆదికేశవ' సినిమాలు వరుసగా బాక్సాఫీస్ వద్ద నిరుత్సాహపరిచాయి. దీంతో వైష్ణవ్ కూడా తన అప్కమింగ్ మూవీస్ విషయంలో తగు జాగ్రత్తలు తీసుకం విషయంలో ఆచితూచి అడుగులేస్తున్నట్లు తెలుస్తోంది. అందుకే ఇంత వరకు వైష్ణవ్ నుంచి మరో కొత్త కబురు వినపడలేదు.