'విజయ్‌ 69' పూజా కార్యక్రమం - స్పెషల్ గిఫ్ట్ ఇచ్చిన నిర్మాత - Thalapathy 69 Pooja Ceremony

Thalapathy 69 Pooja Ceremony : విజయ్ అప్​కమింగ్ మూవీ 'దళపతి 69' పూజా కార్యక్రమం చెన్నైలో అట్టహాసంగా జరిగింది. ఇందులో పాల్గొన్న నిర్మాత శివ, హీరో విజయ్‌కు ఓ స్పెషల్‌ గిఫ్ట్‌ ఇచ్చారు.

Thalapathy 69 Pooja Ceremony :కోలీవుడ్ స్టార్ హీరో విజయ్ తాజాగా 'గోట్​'తో సక్సెస్ అందుకున్నారు. ఇతర భాషల్లో అంతగా టాక్ తెచ్చుకుని ఈ చిత్రం తమిళంలో మాత్రం బ్లాక్​బస్టర్ వసూళ్లతో దూసుకెళ్లింది. అయితే ఓ వైపు రాజకీయాల్లో బిజీగా ఉన్న దళపతి తన అప్​కమింగ్ మూవీలో నటించేందుకు సిద్ధంగా ఉన్నారు. 'దళపతి 69' అనే వర్కింగ్ టైటిల్​తో తెరకెక్కుతున్న ఈ చిత్రాన్ని హెచ్. వినోద్ డైరెక్ట్ చేస్తున్నారు.

ఈ నేపథ్యంలో తాజాగా ఈ సినిమాకు సంబంధించిన పూజా కార్యక్రమం చెన్నైలో గ్రాండ్​గా జరిగింది. ఇందులో ప్రధాన నటీనటులతో పాటు మిగతా మూటీ టీమ్ కూడా పాల్గొని సందడి చేశారు. ప్రస్తుతం దీనికి సంబంధించిన ఫొటోలు కూడా నెట్టింట తెగ ట్రెండ్ అవుతున్నాయి.

అయితే ఈ కార్యక్రమంలో ఓ ఆసక్తికరమైన విషయం జరిగింది. అదేంటంటే ఈ ఈవెంట్​కు హాజరైన శివ అనే నిర్మాత విజయ్‌కు ఓ స్పెషల్‌ గిఫ్ట్‌ ఇచ్చారు. 'GOAT' అని రాసి ఉన్న ఓ గోల్డ్ రింగ్​ను ఆయనకు బహూకరించారు. దాన్ని అందుకున్న విజయ్‌ ఆ రింగ్​ను వేసుకుని ఫొటోలు దిగారు. అందులో విజయ్ న్యూ లుక్​తో అభిమానులను ఆకట్టుకున్నారు.

'దళపతి 69' నటీనటులు వీరే!
ఇక 'దళపతి 69'లో నటించనున్న తారాగణం గురించి మేకర్స్ తాజాగా ఓ స్పెషల్ పోస్టర్స్ రిలీజ్ చేసి అనౌన్స్ చేశారు. ఇందులో విజయ్ సరసన పూజాహెగ్డే నటిస్తుండగా, బాబీ దేవోల్‌ ప్రతినాయకుడిగా మెరవనున్నారు. వీరితో పాటు గౌతమ్‌ వాసుదేవ్‌ మేనన్‌, మమితా బిజు, ప్రియమణి, ప్రకాశ్‌రాజ్‌ కీలక పాత్రల్లో కనిపించనున్నారు. కె.వి.ఎన్‌ ప్రొడక్షన్స్‌ పతాకంపై ప్రతిష్టాత్మకంగా నిర్మితవ్వనున్న ఈ చిత్రానికి సంబంధించిన రెగ్యూలర్ షూట్ శనివారం నుంచి ప్రారంభం కానుందని సమాచారం.

అయితే విజయ్‌ గత కొంతకాలంగా రాజకీయాల్లో బిజీగా ఉంటున్నారు. ఈ క్రమంలోనే ఇకపై సినిమాలకు దూరంగా ఉంటానంటూ గతంలోనే ప్రకటించారు. దీంతో 'దళపతి 69' తర్వాత ఆయన సినిమాలు చేయకపోవచ్చని పలువురు అభిప్రాయపడుతున్నారు. మరోవైపు అభిమానులు కూడా ఆందోళన చెందుతున్నారు.