Fahadh Faasil Bollywood Movie : ఓ వైపు హీరోగా, మరోవైపు విలన్గా, ఇంకోవైపు కీలకమైన పాత్రల్లో - ఇలా వైవిధ్యమైన రోల్స్ చేస్తూ ప్రేక్షకుల్ని అలరిస్తుంటారు మలయాళ స్టార్ యాక్టర్ ఫహాద్ ఫాజిల్‌. ముఖ్యంగా పుష్ప సిరీస్లో విలన్గా నటించి తెలుగు ప్రేక్షకులకు మరింత దగ్గరైన ఫహాద్, త్వరలోనే బాలీవుడ్‌లోకి అడుగుపెడుతున్నట్లు గత కొద్ది రోజులుగా వార్తలు వస్తోన్న సంగతి తెలిసిందే. ఇప్పుడీ సినిమా గురించి మరో ఆసక్తికరమైన అప్డేట్ బయటికొచ్చింది.
తాజాగా ఈ ప్రాజెక్టుకు 'ఇడియట్స్‌ ఆఫ్‌ ఇస్తాంబుల్‌' అనే పేరును ఖరారు చేసినట్లు తెలిసింది. ఇంతియాజ్‌ అలీ దీనిని తెరకెక్కిస్తున్నారు. సినిమాలో ఫహాద్ సరసన యానిమల్ బ్యూటీ త్రిప్తి దిమ్రీ కనిపించనుందని టాక్ వినిపిస్తోంది.
ఈ సినిమాను రొమాంటిక్‌ కామెడీగా తీర్చిదిద్దుతున్నట్లు తెలిసింది. చిత్రంలో ఫహాద్, త్రిప్తిల జోడీ తెరపై ఆకర్షణీయంగా కనిపిస్తుందని, త్వరలో పూర్తి వివరాల్ని వెల్లడించనున్నారని చిత్ర సన్నిహిత వర్గాలు చెప్పాయి. ఇప్పటికే ప్రీ-ప్రొడక్షన్‌ పనులు ప్రారంభించుకుందట. ఇక ఈ సినిమా చిత్రీకరణ వచ్చే ఏడాది ప్రథమార్ధంలో మొదలు కానుందని సమాచారం అందింది.