Prithviraj Aadujeevitham The Goat Life 100 crores :'సలార్' ఫేమ్ మలయాళ స్టార్ హీరో కమ్ డైరెక్టర్ పృథ్వీరాజ్ నటించిన 'ఆడుజీవితం' రీసెంట్గా విడుదలై మంచి టాక్ తెచ్చుకుంది. ఇంకా సక్సెస్ఫుల్గా రన్ అవుతూనే ఉంది. అయితే తెలుగులో మాత్రం 'టిల్లు స్క్వేర్' జోరు ఎక్కువగా ఉండటం వల్ల ఆ చిత్రాన్ని ఇక్కడ ఎక్కువగా పట్టించుకోలేదు. కానీ ఒరిజినల్ వెర్షన్లో మాత్రం బాక్సాఫీస్ దగ్గర మంచి వసూళ్లను సాధించింది. ప్రపంచవ్యాప్తంగా ఇప్పటివరకూ రూ.100 కోట్లకు పైగా గ్రాస్‌ వసూళ్లను అందుకుందని మూవీ టీమ్ తాజాగా ప్రకటించింది. ఈ సందర్భంగా తమ చిత్రానికి గొప్ప విజయాన్ని అందించిన ప్రేక్షకులకు పృథ్వీరాజ్ సుకుమారన్ ధన్యవాదాలు తెలిపారు.
కాగా, ఈ చిత్రాన్ని మలయాళీ డైరెక్టర్ బ్లెస్సీ తమ డ్రీమ్‌ ప్రాజెక్ట్‌గా తెరకెక్కించారు. కేరళకు చెందిన నజీబ్ అనే వ్యక్తి జీవితాన్ని ఆధారంగా చేసుకుని రూపొందించారు. బెన్నీ డానియల్‌ (బెన్యామిన్) గోట్ డేస్ అనే నవల రచించారు. దీనికి విశేష ఆదరణ దక్కింది. ఈ నవలనే బ్లెస్సీ 'ఆడుజీవితం' సినిమాగా తెరకెక్కించారు. దాదాపు 16 ఏళ్ల పాటు కష్టపడి మరీ దీన్ని తీర్చిదిద్దారు. దాదాపు రూ.82 కోట్ల బడ్జెట్ పెట్టి నిర్మించారని సమాచారం. అలానే ఈ సినిమా కోసం పృథ్వీరాజ్ కూడా ఎంతో కష్టపడ్డారు. కొన్ని సీన్స్ కోసం 31 కిలోల బరువు కూడా తగ్గారు. 72 గంటల పాటు భోజనం లేకుండా కేవలం మంచినీళ్లు మాత్రమే తాగారు.