Pawankalyan Ustaad Bhagat Singh : పవర్ స్టార్ పవన్ కల్యాణ్ ప్రస్తుతం వరుస సినిమాలను లైన్లో పెట్టిన సంగతి తెలిసిందే. కానీ ప్రస్తుతం ఏపీలో ఎలక్షన్స్ దగ్గర పడుతున్న నేపథ్యంలో షూటింగ్లకు కాస్త బ్రేక్ ఇచ్చారు. ప్రచార సభల్లో బిజీ బిజీగా గడుపుతున్నారు. అయితే రీఎంట్రీలో వకీల్ సాబ్, భీమ్లానాయక్, బ్రో చిత్రాలతో ప్రేక్షకుల్ని అలరించారు.
ప్రస్తుతం ఆయన చేతిలో ఉన్న చిత్రాల్లో ఉస్తాద్ భగత్ సింగ్ కూడా ఒకటి. 'గబ్బర్ సింగ్' వంటి బ్లాక్ బస్టర్ హిట్ తర్వాత పవన్ కల్యాణ్ - హరీష్ శంకర్ కాంబోలో వస్తుండటం వల్ల దీనిపై భారీ అంచనాలే నెలకొన్నాయి. ఫుల్ లెంగ్త్ మాస్ ఎంటర్‌టైనర్‌గా రాబోతుందీ చిత్రం. ఈ మూవీ రెగ్యులర్ షూటింగ్‌ను గత ఏడాదిలోనే మొదలు పెట్టారు మేకర్స్. మొదటి షెడ్యూల్‌ను కూడా జరిపారు. కానీ ఎలక్షన్స్ దగ్గర పడుతున్న నేపథ్యంలో పవన్ కల్యాణ్ డేట్స్ అడ్జస్ట్ కాక షూటింగ్ తాత్కాలికంగా నిలిచిపోయింది.
కానీ ఈ చిత్రం మొత్తానికే ఆగిపోయిందన్న వార్తలు జోరుగా ప్రచారం సాగాయి. ఇలాంటి రూమర్స్ నేపథ్యంలో తాజాగా ఈ సినిమా నుంచి అదిరిపోయే ట్రీట్‌ను ఇచ్చేందుకు రెడీ అయ్యారు మేకర్స్. ఉస్తాద్ భగత్ సింగ్ మూవీ నుంచి ఊహించనిది రాబోతుంది అంటూ ఓ పోస్ట్ పెట్టారు. అలాగే, రెండు ఎమోజీలను కూడా జత చేశారు. దీంతో ఈ మూవీ నుంచి గ్లింప్స్ రాబోతుందని అంతా ఆశిస్తున్నారు. పవన్ పొలిటికల్ డైలాగ్‌తో కూడిన ఓ స్పెషల్ వీడియోను త్వరలోనే రిలీజ్ చేయబోతున్నట్లు తెలుస్తోంది.