రెహమాన్‌ విడాకులతో లింక్‌ రూమర్స్​ - క్లారిటీ ఇచ్చిన మోహినిదే

ఏఆర్‌ రెహమాన్‌ దంపతుల విడాకులతో తన డివోర్స్‌ను లింక్ చేస్తూ వస్తోన్న వార్తలపై స్పందించిన రెహమాన్‌ టీమ్ మెంబర్ మోహినిదే.

AR Rahman Mohini Dey Divorce : ప్రముఖ సంగీత దర్శకుడు, ఆస్కార్ అవార్డ్ గ్రహీత రెహమాన్‌ - సైరా బాను దంపతులు విడాకులు తీసుకోబోతున్నట్లు ప్రకటించిన విషయం తెలిసిందే. అయితే ఈ జంట డివోర్స్​ ప్రకటించిన కాసేపటిలోనే రెహమాన్‌ టీమ్​లోని 29 ఏళ్ల మోహినిదే అనే సభ్యురాలు కూడా తన భర్త నుంచి విడిపోతున్నట్లు తెలిపింది. అలా ఈ ఇద్దరూ ఒకే సారి నిర్ణయం ప్రకటించడంపై రకరకాల వార్తలు రావడం ప్రారంభం అయ్యాయి. ఈ రెండు జంటల విడాకులకు ఏమైనా సంబంధం ఉందా? అంటూ చర్చించుకోవడం ప్రారంభించారు. దీంతో ఈ విషయం ప్రస్తుతం చర్చనీయాంశంగా మారింది. సోషల్ మీడియాలో చాలా మంది దీని గురించే తెగ మాట్లాడుకుంటున్నారు. అయితే తాజాగా ఈ విషయంపై మోహినిదే స్పందించారు. ఆ రూమర్స్‌ను ఆమె ఖండించారు. తన గోప్యతను ప్రతి ఒక్కరూ గౌరవించాలని కోరారు.

"నేను డివోర్స్​ గురించి అనౌన్స్​ చేసినప్పటి నుంచి ఇంటర్వ్యూల కోసం చాలా మంది ఫోన్‌ చేస్తున్నారు. కానీ వారంతా నా ఇంటర్వ్యూలను ఎందుకు అడుగుతున్నారో తెలుసు. నేను ప్రతిఒక్కరి రిక్వెస్ట్​ను గౌరవంగా తిరస్కరిస్తున్నాను. ఎందుకంటే వారు ఏం అనుకుంటున్నారో, దాని గురించి మాట్లాడడానికి అస్సలు ఆసక్తి లేదు. ఇలాంటి రూమర్స్‌పై మాట్లాడి నా విలువైన సమయాన్ని వృథా చేసుకోలేను. ప్లీజ్​ నా గోప్యతను గౌరవించండి" అని మోహినిదే చెప్పుకొచ్చారు.

AR Rahman Saira Banu Divorce -ఇదే విషయంపై రెహమాన్ భార్య సైరా తరఫు న్యాయవాది వందనా షా కూడా ఇంతకముందే స్పందించారు. బయట చక్కర్లు కొట్టే రూమర్స్​లో ఎటువంటి నిజం లేదని క్లారిటీ ఇచ్చారు. "ఈ రెండు జంటల డివోర్స్​కు ఎలాంటి సంబంధం లేదు. పరస్పర అంగీకారంతోనే సైరా- రెహమాన్‌ ఈ నిర్ణయాం తీసుకున్నారు. వైవాహిక బంధంలో సైరా వ్యక్తిగతంగా ఎన్నో ఎత్తుపల్లాలను చూశారు. వారిద్దరూ విడిపోవడానికి చాలా కారణాలు ఉన్నాయి" అని పేర్కొన్నారు. ఇక రెహమాన్ పిల్లలు కూడా ఈ విషయంపై స్పందించారు. అందులో నిజం లేదని స్పష్టత ఇచ్చారు.