Chiranjeevi Vishwambhara Teaser : తెలుగు రాష్ట్రాల్లో అభిమానులు, సినీ ప్రియులు దసరా వేడుకలను ఘనంగా జరుపుకుంటూ సంతోషంగా గడుపుతున్నారు. ఈ వేడుకల్లో విశ్వంభర టీమ్ కూడా భాగం అయింది. మెగాస్టార్ చిరంజీవి కథానాయకుడిగా తెరకెక్కుతున్న ఈ విశ్వంభర నుంచి టీజర్ విడుదలైంది. అంచనాలు పెంచేలా సాగిందీ ప్రచార చిత్రం. చిరంజీవి మాస్‌ అవతార్‌, పవర్‌ఫుల్‌ డైలాగులు, గ్రాండ్ విజువల్స్‌తో అదిరిపోయింది. టీజర్ చూస్తున్నంత సేపు మరో ప్రపంచంలో ఉన్న ఫీలింగ్‌ కలిగేలా దీన్ని తీర్చిదిద్దారు. ప్రస్తుతం ఈ విశ్వంభర టీజర్ సోషల్‌ మీడియాలో తెగ ట్రెండ్‌ అవుతోంది.
"విశ్వాన్ని అలుముకున్న ఈ చీకటి, విస్తరిస్తున్నంత మాత్రానా వెలుగు రాదని కాదు, ప్రశ్నలు పుట్టించిన కాలమే, సమాధానాన్ని కూడా సృష్టిస్తుంది. విర్రవీగుతున్న ఈ అరాచకానికి ముగింపు పలికే మహాయుద్ధాన్ని తీసుకొస్తుంది." అని బ్యాక్గ్రౌండ్ వాయిస్ రాగా, అప్పుడు 'మిత్రా యుద్దం వస్తుందని అన్నావ్ కదా, ఎలాంటి ఉంటుంది ఆ యుద్ధం' అంటూ మరో పాప చెప్పిన డైలాగ్స్‌తో టీజర్ మొదలైపోయింది. ఆ సమయంలో చిరు ఎంట్రీ, యాక్షన్ సీక్వెన్స్ అందరినీ ఆశ్చర్యపరిచేలా ఉన్నాయి. టీజర్లో శ్వేత అశ్వంపై స్వారీ చేస్తూ కనిపించారు మెగాస్టార్. బ్యాక్గ్రౌండ్ మ్యూజిక్ అదిరిపోయింది.
మరో ప్రపంచంలోకి - ఇక ఈ సినిమా కోసం 13 భారీ సెట్‌లతో విభిన్న ప్రపంచాన్ని వశిష్ఠ సృష్టించినట్లు ఆ మధ్య వార్తలు వచ్చాయి. దీంతో బింబిసార తర్వాత వశిష్ట ఎలాంటి ప్రపంచాన్ని సృష్టిస్తాడో అని మెగా అభిమానులు ఎదురుచూశారు. అందరి ఎదురు చూపులకు తగ్గట్టుగానే ఇప్పుడీ విశ్వంభర టీజర్ అదిరిపోయింది. గ్రాఫిక్స్తో ఓ కొత్త లోకాన్ని సృష్టించారు. మొత్తంగా ప్రపంచాన్ని నాశనం చేసేందుకు దుష్టశక్తి రావడం, వెలుగులు పంచేందుకు మానవాతీత శక్తి రావడం అనే కాన్సెప్ట్తో విశ్వంభర వస్తున్నట్టు ఈ టీజర్ చూస్తే అర్థమవుతోంది.
పాప సెంటిమెంట్తోనే - ఇకపోతే బింబిసారలో చిన్న పాపతో కథను ముడిపెడుతూ ఎమోషనల్‌గా తెరకెక్కించాడు వశిష్ఠ. ఇప్పుడు విశ్వంభరలోనూ పాపా కాన్సెప్ట్ హైలైట్ కానున్నట్లు తెలుస్తోంది. మిత్రా అంటూ ఓ చిన్న పాప చెప్పిన డైలాగ్‌తోనే చిరంజీవి ఎంట్రీ ఇవ్వడం హైలైట్గా ఉంది. ఇక ప్రచార చిత్రం చివర్లో ఆంజనేయుడి విగ్రహం ముందు చిరు ఫైట్ సీన్, చివరి షాట్‌లో ఆంజనేయుడ్ని, చిరంజీవిని ఒకే ఫ్రేమ్లో చూపించడం అదిరిపోయింది.