అలర్ట్- పెరగనున్న కార్ల ధరలు- లిస్ట్​లో ఏఏ కంపెనీలు ఉన్నాయంటే?

ప్రముఖ కార్ల ధరలు పెంపు- న్యూ ఇయర్ నుంచే ఎఫెక్ట్

Car Prices Hike 2025 India :కొత్త సంవత్సరం వచ్చేస్తోంది. వాహనప్రియులు ఈ ఏడాది కొనుగోలు చేయాలేకపోయిన తమ ఫేవరెట్ కారును, కొత్త సంవత్సరంలోనైనా కొనాలని ప్లాన్స్ వేసుకుంటారు. దేశంలో పండగ సీజన్​లో వాహనాల సేల్స్ పెరుగుతుంటాయి. దీంతో చాలా మంది కొత్త సంవత్సరంలో వచ్చే తొలి పండగ సంక్రాంతికే కారు కొనుగోలు చేయాలని భావిస్తారు. అయితే అలాంటి వారికి పలు కార్ల కంపెనీలు షాక్ ఇచ్చేందుకు సిద్ధమయ్యాయి.

పలు దిగ్గజ కంపెనీలు వరుసగా ధరల పెంపుపై ప్రకటనలు చేస్తున్నాయి. ఇటీవల ప్రముఖ కంపెనీ హ్యుందాయ్‌ ధరల పెంపునపై ప్రకటన చేయగా, తాజాగా మారుతీ సుజుకీ కూడా అలాంటి నిర్ణయమే తీసుకుంది. 2025 జనవరి నుంచే పెరిగిన ధరలు అమల్లోకి రానున్నాయి. మరి ఇప్పటివరకు ఏఏ కంపెనీలు ధరలు పెంచాయి? ఏ మోడల్​కు ఎంత మేర పెరగనుంది? ఈ స్టోరీలో తెలుసుకుందాం!

మారుతీ సుజుకీ
భారత్ ప్రముఖ కార్ల కంపెనీ మారుతీ సుజుకీ శుక్రవారం ధరల పెంపుపై ప్రకటన చేసింది. తమ కంపెనీ కార్ల ధరలు గరిష్ఠంగా 4 శాతం పెరగనున్నట్లు వెల్లడించింది. అయితే కారు మోడల్, వేరియంట్ ఆధారంగా ధర ఉండనుంది. ఈ పెరిగిన ధరలు 2025 జనవరి నుంచి అమలు అవుతాయని పేర్కొంది.

హ్యుందాయ్
హ్యుందాయ్‌ మోటార్‌ ఇండియా లిమిటెడ్‌ కూడా కార్ల ధరలను పెంచనుంది. ఈ మేరకు గురువారం ప్రకటించింది. హ్యుందాయ్​లో అన్ని మోడళ్లపై రూ.25 వేల వరకు పెంపు ఉంటుందని తెలిపింది. పెరిగిన ధరలు 2025 జనవరి 1 నుంచే అమలు కానున్నాయి.

అదే రూటులో బెంజ్, బీఎమ్​డబ్ల్యూ, ఆడి
ప్రముఖ లగ్జరీ కార్ కంపెనీలు ఆడి, బెంజ్, బీఎమ్​డబ్ల్యూ కూడా ఆ దిశగా అడుగులు వేస్తున్నాయి. ఈ కంపెనీలు ఇప్పటికే ధరల పెంపును వెల్లడించాయి. అన్ని వేరియంట్లలో గరిష్ఠంగా 3 శాతం ధరలు పెరగనున్నట్లు ప్రకటించాయి.

మహీంద్రా కూడా!
మహీంద్రా కార్స్​ కూడా ఇప్పటికే ధరలు పెంచేసింది. ఆయా వేరియంట్లను బట్టి రూ.30- 50 వేల వరకు పెంచింది. దీంతోపాటు ఎమ్​జీ (MG), కియా (KIA) లాంటి కంపెనీలు సైతం ఈ ఏడాది ఇప్పటికే ధరలు పెంచేశాయి.

పెరుగుదలకు కారణం
కార్ల ధరల పెంపునకు ఆయా కంపెనీలు పలు కారణాలు చెబుతున్నాయి. లాజిస్టిక్‌ ఖర్చులు, ఉత్పత్తి వ్యయం పెరగడం వల్ల ధరలపై ప్రభావం పడుతుందని హ్యుందాయ్ తెలిపింది.