Vinesh Phogat Properties List :భారత స్టార్‌ రెజ్లర్‌ వినేశ్ ఫొగాట్ తాజాగా రాజకీయాల్లోకి అడుగుపెట్టిన సంగతి తెలిసిందే. అయితే మరికొన్ని రోజుల్లో జరగనున్న హరియాణా అసెంబ్లీ ఎన్నికల్లో ఆమె కాంగ్రెస్ తరఫున బరిలోకి దిగారు. ఈ నేపథ్యంలో ఆమె తాజాగా జులానా నియోజకవర్గం నుంచి నామినేషన్ను దాఖలు చేశారు. ఈ సందర్భంగా ఆమె సమర్పించిన అఫిడవిట్లో తన ఆస్తుల వివరాలను వెల్లడించారు.
ఇంతకీ ఆ అఫిడవిట్లో ఏముందంటే?
వినేశ్ దగ్గర రూ.4కోట్లకు పైగా విలువైన స్థిర, చరాస్తులు ఉన్నట్లు ఆమె తన అఫిడవిట్లో వెల్లడించారు. సోనిపత్‌లో రూ.2కోట్లు విలువ చేసే స్థిరాస్తి ఉందన్నారు. ఇక ఆమె వద్ద అందులో మూడు కార్లు ఉన్నట్లు పేర్కొన్నారు. అందులో రూ.35 లక్షల విలువ చేసే వోల్వో ఎక్స్‌సీ 60, రూ.12 లక్షల విలువ చేసే హ్యుందాయ్‌ క్రెటా, రూ.17లక్షల గల టొయోటా ఇన్నోవా కార్లు ఉన్నట్లు పేర్కొన్నారు. ఇన్నోవా కోసం రూ.13 లక్షల అప్పు తీసుకున్నానని, ప్రస్తుతం ఆ మొత్తాన్ని తిరిగి చెల్లిస్తున్నట్లు తెలిపారు. తన భర్త సోమ్‌వీర్‌ రాఠీ పేరిట రూ.19లక్షల విలువైన మహీంద్రా స్కార్పియో కారు కూడా ఉన్నట్లు అఫిడవిట్లో పేర్కొన్నారు.
రూ.39లక్షల బ్యాంకు డిపాజిట్లు
ఇదిలా ఉండగా, ఆమె చేతిలో రూ.1.95లక్షల నగదు ఉన్నట్లు వినేశ్ తెలిపారు. మూడు బ్యాంకుల్లో దాదాపు రూ.39లక్షలు డిపాజిట్లు ఉండగా, ఆమె భర్తకు మరో రూ.30లక్షలకు మేర బ్యాంకు డిపాజిట్లు ఉన్నాయని అన్నారు. 35 గ్రాముల బంగారం, 50 గ్రాముల వెండి ఆభరణాలు కూడా తన వద్ద ఉన్నట్లు పేర్కొన్నారు. దీని విలువ రూ.2.74లక్షల మేర ఉంటుంది. ఇక భర్తకు 28 గ్రాముల బంగారం, 100 గ్రాముల వెండి ఉన్నట్లు తెలిపారు. మద్రాసులో వినేశ్ గ్రాడ్యుయేషన్ పూర్తిచేసినట్లు తన అఫిడవిట్లో వెల్లడించారు.