రామ్‌ గోపాల్‌ వర్మకు 3 నెలల జైలు శిక్ష- నాన్​బెయిలబుల్ వారెంట్ జారీ

చెక్‌ బౌన్స్‌ కేసులో రామ్‌ గోపాల్‌ వర్మకు 3 నెలల జైలు శిక్ష

Cheque Bounce CaseRam Gopal Varma :చెక్‌ బౌన్స్‌ కేసులో దర్శకుడు రామ్‌ గోపాల్‌ వర్మకు ముంబయి కోర్టు 3 నెలల జైలు శిక్ష విధించింది. ఆయనపై నాన్​బెయిలబుల్ అరెస్ట్ వారెంట్ జారీ చేసింది. మూడు నెలల్లో ఫిర్యాదుదారుడికి రూ.3.7లక్షల పరిహారం చెల్లించాలని అంధేరీ మెజిస్ట్రేట్‌ కోర్టు ఆదేశించింది.

2018లో మహేశ్‌ చంద్ర అనే వ్యక్తి వర్మపై ఈ చెక్‌ బౌన్స్‌ కేసును వేశారు. అయితే 2022 ఏప్రిల్​లో రూ.5000 నగదు పూచీకత్తుతో కోర్టు వర్మకు బెయిల్​ మంజూరు చేసింది. దీనిపై గత ఏడేళ్లుగా వాదనలు జరుగుతున్నాయి. రామ్​గోపాల్ వర్మ కోర్టుకు హాజరు కాలేదు. దీంతో న్యాయస్థానం జనవరి 21న(మంగళవారం) రామ్​గోపాల్ వర్మకు శిక్షను విధిస్తూ అంధేరీ మేజిస్ట్రేట్ వైపీ పూజారి ​నాన్​బెయిలబుల్ వారెంట్​ను జారీ చేశారు.

అంధేరీ కోర్టు తీర్పుపై స్పందించారు వర్మ. "ఈ కేసు గురించి స్పష్టత ఇవ్వాలని అనుకుంటున్నా. ఇది 7 ఏళ్ల క్రితం జరిగిన విషయం. నా మాజీ ఉద్యోగికి సంబంధించిన రూ.2.38 లక్షల చెక్​ బౌన్స్ కేసు. ప్రస్తుతం ఈ కేసు కోర్టులో ఉన్నందున దీనిపై ఇంతకు మించి ఏమీ చెప్పలేను' అని రామ్​ గోపాల్ వర్మ అన్నారు.