How To Make Egg Puff Without Oven :చిన్న పిల్లల నుంచి పెద్దవారి వరకు ఎక్కువ మంది ఇష్టపడి తినే స్నాక్ ఐటమ్లో ఎగ్ పఫ్ కూడా ఉంటుంది. ఈ క్రమంలోనే చాలా మంది బేకరీ నుంచి తెప్పించుకొని తింటుంటారు. కానీ, ఇంట్లోనే వీటిని ఈజీగా ప్రిపేర్ చేసుకోవచ్చని మీకు తెలుసా? అవును.. ఓవెన్ కూడా అవసరం లేకుండా చాలా సులభంగా ఎగ్ పఫ్లను తయారు చేసుకోవచ్చు. అదెలాగో ఇప్పుడు చూద్దాం.
కావాల్సిన పదార్థాలు :
- మైదా - ఒక కప్పు
- ఉప్పు - పావు టీస్పూన్
- చక్కెర - పావు టీస్పూన్
- బటర్ - 50 గ్రాములు
స్టఫింగ్ కోసం :
- ఆయిల్ - 1 టేబుల్స్పూన్
- ఉల్లిపాయలు - 2 ( మీడియం సైజ్లో ఉన్నవి)
- పచ్చిమిర్చి - 2(సన్నగా తరుక్కోవాలి)
- అల్లంవెల్లుల్లి పేస్ట్ - అర టీస్పూన్
- పసుపు - చిటికెడు
- కారం - అర టీస్పూన్
- అర టీస్పూన్ చొప్పున - జీలకర్ర పొడి, ధనియాల పొడి, చాట్ మసాలా
- ఎగ్స్ గార్నిష్ కోసం - కాస్త పెప్పర్ పొడి, కారం, ఉప్పు.
తయారీ విధానం :
- ఒక బౌల్ తీసుకొని మైదా, ఉప్పు, పంచదార వేసుకొని తగినన్ని చల్లటి నీరు యాడ్ చేసుకుంటూ చపాతీ పిండి ముద్దలా సాఫ్ట్గా మారే వరకు బాగా కలుపుకోవాలి. తర్వాత దానిపై మూతపెట్టి 25 నుంచి 30 నిమిషాల పాటు పక్కన ఉంచుకోవాలి.
- ఆలోపు రెసిపీలోకి కావాల్సిన రెండుఎగ్స్(Eggs)ఉడికించుకొని పొట్టు తీసుకొని పక్కన ఉంచుకోవాలి. అయితే, ఇక్కడ నాలుగు ఎగ్ పఫ్లకు సరిపడా పదార్థాలనే చెబుతున్నాం. ఒకవేళ.. మీరు ఎక్కువ చేసుకోవాలనుకుంటే కావాల్సిన పదార్థాలను పెంచుకోవాల్సి ఉంటుంది.
- అనంతరం 50 గ్రాముల బటర్ తీసుకొని కాసేపు రూమ్ టెంపరేచర్లో సాఫ్ట్గా అయ్యేంత వరకు ఉంచుకోవాలి.
- ఇప్పుడు నానబెట్టుకున్న పిండిని తీసుకొని మరోసారి 2 నిమిషాల పాటు బాగా కలుపుకోవాలి.
- ఆ తర్వాత చపాతీ పీటపై పిండిని ఉంచి కాస్త పొడి పిండి చల్లుకుంటూ.. హాఫ్ ఇంచ్ మందంతో పల్చగా మారే వరకు రెక్ట్ యాంగిల్ షేప్లో చపాతీ కర్రతో రోల్ చేసుకోవాలి.
- ఆవిధంగా చేసుకున్నాక 25 గ్రాముల సాఫ్ట్ బటర్ తీసుకొని దానిపై మొత్తం స్ప్రెడ్ అయ్యేలా చేతితో రుద్దుకోవాలి. తర్వాత దానిపై కొంచం పొడి మైదా చల్లుకోవాలి.
- అనంతరం మొదట రెండు చివరలను మధ్యలోకి ఫోల్డ్ చేసి.. తర్వాత మరోసారి ఫోల్డ్ చేసుకోవాలి. అంటే.. బుక్ ఫోల్డ్ మాదిరిగా చేసుకోవాలి.
- తర్వాత దానిపై మరోసారి కాస్త పొడి మైదా చల్లుకొని ఒక ప్లేట్లోకి తీసుకొని, తడి క్లాత్ దానిపై ఉంచి ఒక 20 నిమిషాల పాటు ప్రీజర్లో పెట్టుకోవాలి.
- ఆలోపు ఎగ్ పఫ్ స్టఫింగ్ ప్రిపేర్ చేసుకోవాలి. అందుకోసం.. స్టౌపై ఒక చిన్న పాన్ పెట్టుకొని నూనె పోసుకొని సన్నగా తరుక్కున్న పచ్చిమిర్చి, ఆనియన్స్, రుచికి సరిపడా ఉప్పు వేసుకొని బ్రౌన్ కలర్లోకి మారేంత వరకు ఫ్రై చేసుకోవాలి.
- అనంతరం అల్లం వెల్లుల్లి పేస్ట్ వేసి పచ్చి వాసన పోయేంత వరకు వేయించుకోవాలి. ఆపై చిటికెడు పసుపు, కారం, ధనియాల పొడి, జీలకర్ర పొడి, చాట్ మసాలాతో పాటు కొద్దిగా వాటర్ వేసుకొని ఫ్రై చేసుకొని పక్కన ఉంచుకోవాలి.
- ఇప్పుడు ప్రీజర్లో ఉంచిన పిండిని తీసుకొని దానిపై కాస్త పొడి మైదా చల్లుకొని మరోసారి రెక్ట్ యాంగిల్ షేప్లో అది స్ప్రెడ్ అయ్యేంత వరకు రోల్ చేసుకోవాలి.
- తర్వాత మిగిలిన బటర్ను దానిపై అప్లై చేసుకోవాలి. ఆపై కొంచం పొడి మైదాను చల్లుకొని మొదట చివరలను మధ్యకు ఫోల్డ్ చేసి.. తర్వాత మరోసారి ఫోల్డ్ చేసుకోవాలి. బుక్ ఫోల్డ్ మాదిరిగా చేసుకోవాలి.
- అనంతరం దానిపై మరోసారి కొంచం పొడి మైదా చల్లుకొని ఒక ప్లేట్లోకి తీసుకొని ఒక తడి క్లాత్ పేస్ట్రీపై ఉంచి అరగంటపాటు మరోసారి ప్రీజర్లో ఉంచుకోవాలి.
- తర్వాత.. ఫ్రీజర్లో ఉంచిన పఫ్ పేస్ట్రీ తీసుకొని సగానికి కట్ చేసుకోవాలి. అందులో ఒక పార్ట్ను తీసుకొని కాస్త మైదా చల్లుకుంటూ స్క్వేర్ షేప్లో స్ప్రెడ్ చేసుకోవాలి. ఆపై దాన్ని నాలుగు సమాన భాగాలుగా కట్ చేసుకోవాలి.
- ఇప్పుడు ఉడికించుకున్న ఎగ్స్ను సగానికి కట్ చేసుకొని వాటిపై కాస్త పెప్పర్ పౌడర్, చిల్లీ పౌడర్, ఉప్పు చల్లుకోవాలి.
- తర్వాత కట్ చేసుకున్న నాలుగు పఫ్ పేస్ట్రీలపై ముందుగా రెడీ చేసుకున్న ఆనియన్ కర్రీని కొద్దికొద్దిగా వేసుకొని ఆపై ఎగ్స్ని కట్ చేసిన భాగం ఆనియన్ కర్రీ వైపు ఉండేలా పెట్టుకోవాలి.
- అనంతరం పేస్ట్రీ రెండు చివరలకు కాస్త వాటర్ లేదా పాలు అప్లై చేసుకొని ఎగ్ పఫ్ మాదిరిగా క్లోజ్ చేయాలి.
- ఇప్పుడు స్టౌపై ఒక లోతుగా ఉండే గిన్నె పెట్టుకొని అందులో ఒక స్టాండ్ ఉంచి ఐదు నిమిషాల పాటు ఫ్రీ హీట్ చేసుకోవాలి.
- ఆ తర్వాత బేకింగ్ కోసం.. బేకింగ్ బౌల్ లేదా ప్లేట్ తీసుకొని దానికి కాస్త ఆయిల్ లేదా బటర్ అప్లై చేసి ప్రిపేర్ చేసుకున్న ఎగ్ పఫ్స్ అందులో ఉంచి ఫ్రీ హీట్ చేసుకొన్న గిన్నెలో పెట్టుకోవాలి.
- అయితే, ఇక్కడ బేకింగ్ కోసం స్టీల్ పాత్రలను వాడొద్దనే విషయాన్ని గుర్తుంచుకోవాలి. అల్యూమినియం పాత్రలు బెస్ట్.
- ఇప్పుడు మంటను మీడియం ఫ్లేమ్లో ఉంచి 30 నుంచి 35 నిమిషాల పాటు ఒకసారి ఎగ్ పఫ్స్ను బేక్ చేసుకోవాలి.
- ఆ తర్వాత.. అవి బేక్ అయ్యాయనుకున్నాక రెండో వైపు తిప్పుకొని మరో 5 నుంచి 10 నిమిషాల పాటు బేక్ చేసుకోవాలి.
- ఆవిధంగా బేక్ చేసుకున్నాక స్టౌ ఆఫ్ చేసుకొని ఒక ప్లేట్లోకి తీసుకుంటే చాలు. అంతే.. క్రిస్పీగా ఎంతో రుచికరంగా ఉండే "ఎగ్ పఫ్స్" రెడీ!
ఇవీ చదవండి :
ఆశ్చర్యం : నూనె లేకుండా పూరీలు చేసుకోవచ్చు - ప్రిపరేషన్ కూడా చాలా ఈజీ - ఎంతో టేస్టీగా ఉంటాయి!
స్వీట్ షాప్ స్టైల్లో "బూందీ లడ్డూ" - ఈ టిప్స్తో తయారు చేస్తే అమోఘమైన రుచి!
