நடிகர்கள் கவின், மணிகண்டன் நடிப்பைப் புகழ்ந்த இயக்குநர் செல்வராகவன்! - Selvaraghavan appreciate Kavin

Director Selvaraghavan Appreciation actors Kavin and Manikandan: கவினும், மணிகண்டனும் சிறந்த நடிகர்கள். அவர்கள் இருவரிடமும் உள்ள நல்ல விஷயம் அற்புதமாகவும், யதார்த்தமாகவும் நடிக்கக் கூடியதுதான். எந்த கதாபாத்திரத்தையும் எளிதாக உள் வாங்கி நடிக்கக் கூடியவர்கள். தமிழ் சினிமாவுக்கு கிடைத்த சிறந்த நடிகர்கள் என்று இயக்குநர் செல்வராகவன் பாராட்டியுள்ளார்.

சென்னை:இயக்குநர் செல்வராகவன் தமிழ் சினிமாவில் குறிப்பிடத்தக்க இயக்குநராக அறியப்படுபவர். இவரது படங்கள் ரசிகர்கள் மத்தியில் தனியிடம் பிடித்துள்ளவை. குறிப்பாகக் காதல் கொண்டேன், ஆயிரத்தில் ஒருவன், மயக்கம் என்ன, 7ஜி ரெயின்போ காலனி உள்ளிட்ட படங்கள் எல்லா தரப்பினரும் ரசிக்கும் படங்கள் பட்டியலில் இடம் பிடித்துள்ளவை.

சமீப காலமாக நடிப்பிலும் கவனம் செலுத்தி வருகிறார். பீஸ்ட், சாணிக் காயிதம், பகாசூரன், மார்க் ஆண்டனி என நடிப்பிலும் அசத்தி வருகிறார். அதுமட்டுமின்றி எக்ஸ் தளத்தில் அவ்வப்போது சில கருத்துக்கள் பதிவிட்டு வருவார். சில தத்துவங்கள் பதிவிடுவது மற்றும் நல்ல கலைஞர்களைப் பாராட்டுவதை வழக்கமாகக் கொண்டுள்ளார்.

தற்போது, நடிகர் கவின் மற்றும் மணிகண்டன் இருவரையும் பாராட்டிப் பதிவிட்டுள்ளார். அதில், கவினும் மணிகண்டனும் சிறந்த நடிகர்கள். அவர்கள் இருவரிடமும் உள்ள நல்ல விஷயம் அற்புதமாகவும், யதார்த்தமாகவும் நடிக்கக் கூடியதுதான். எந்த கதாபாத்திரத்தையும் எளிதாக உள் வாங்கி நடிக்கக் கூடியவர்கள். தமிழ் சினிமாவுக்கு கிடைத்த சிறந்த நடிகர்கள் என்று பாராட்டியுள்ளார்.

இளன் இயக்கத்தில் கவின் நடித்துள்ள ஸ்டார் திரைப்படம் கடந்த வாரம் திரையரங்குகளில் வெளியாகி ஓடி வருகிறது. இப்படத்தில் கவினின் நடிப்பு ரசிகர்களை மிகவும் கவர்ந்துள்ளது. அதேபோல் மணிகண்டன் நடிப்பில் வெளியான குட் நைட் மற்றும் லவ்வர் ஆகிய படங்களும் அவரது சிறந்த நடிப்பால் ரசிகர்களைக் கவர்ந்தது.

மணிகண்டன் நடிப்பு மட்டுமின்றி வசனகர்த்தா மற்றும் உதவி இயக்குநராகவும் இருப்பவர். கவினும் இயக்குநர் நெல்சனிடம் உதவி இயக்குநராக இருந்தவர் என்பது குறிப்பிடத்தக்கது. கவின் நடிப்பில் லிஃப்ட், டாடா படங்களைத் தொடர்ந்து இந்த ஸ்டார் படமும் இவருக்கு ஒரு நல்ல நடிகர் என்ற பெயரைப் பெற்றுத் தந்துள்ளது. இளன் இயக்கியுள்ள இப்படத்திற்கு யுவன் சங்கர் ராஜா இசை அமைத்துள்ளார்.

இதையும் படிங்க:”சம்பளம் கொடுத்து தான் நாம் வேலைக்குச் செல்கிறோம்”.. காப்புரிமை குறித்து வெற்றிமாறன் கருத்து! - Director Vetrimaaran