ലണ്ടൻ: തുടര്‍ച്ചയായ സമനിലകള്‍ക്ക് ശേഷം യൂറോപ്പ ലീഗില്‍ ഈ സീസണിലെ ആദ്യ ജയം സ്വന്തമാക്കി മാഞ്ചസ്റ്റര്‍ യുണൈറ്റഡ്. ഓള്‍ഡ് ട്രാഫോര്‍ഡില്‍ നടന്ന മത്സരത്തില്‍ ഗ്രീക്ക് ക്ലബ്ല് PAOK FC യെ എതിരില്ലാത്ത രണ്ട് ഗോളിനാണ് യുണൈറ്റഡ് വീഴ്‌ത്തിയത്. കഴിഞ്ഞ ആറ് മത്സരങ്ങളിലും ആദ്യ ഇലവനില്‍ ഇടം ലഭിക്കാതിരുന്ന അമദ് ഡിയാലോയാണ് യുണൈറ്റഡിന്‍റെ രണ്ട് ഗോളും നേടിയത്.
50-ാം മിനിറ്റിലും 77-ാം മിനിറ്റിലുമായിരുന്നു ഗോളുകള്‍. മത്സരത്തിന്‍റെ ഒന്നാം പകുതിയില്‍ മികച്ച ചില അവസരങ്ങള്‍ സൃഷ്‌ടിച്ചെങ്കിലും സ്‌കോര്‍നില ചലിപ്പിക്കാൻ ഇരു ടീമിനും സാധിച്ചിരുന്നില്ല. വിരസമായ ആദ്യ പകുതിക്ക് ശേഷം രണ്ടാം പകുതി അഞ്ച് മിനിറ്റ് പിന്നിട്ടതോടെയാണ് യുണൈറ്റഡ് ആദ്യം ലീഡ് പിടിക്കുന്നത്.