2 ಮತ್ತು 3ನೇ ಶ್ರೇಣಿಯ ನಗರಗಳಲ್ಲಿ ಅತ್ಯಧಿಕ ಆನ್​ಲೈನ್ ಬಸ್​ ಟಿಕೆಟ್ ಬುಕ್ಕಿಂಗ್​

ಶ್ರೇಣಿ 2 ಮತ್ತು 3ರ ನಗರಗಳಲ್ಲಿಯೇ ಅತ್ಯಧಿಕ ಬಸ್ ಟಿಕೆಟ್ ಬುಕ್ಕಿಂಗ್​ ಆಗಿವೆ ಎಂದು ವರದಿ ಹೇಳಿದೆ.

ನವದೆಹಲಿ: ಭಾರತದಲ್ಲಿ ಶೇ 67ರಷ್ಟು ಆನ್​​​ಲೈನ್ ಬಸ್ ಟಿಕೆಟ್ ಬುಕ್ಕಿಂಗ್​​​​​ಗಳು 2 ಮತ್ತು 3ನೇ ಶ್ರೇಣಿಯ ನಗರಗಳಿಂದ ಆಗಿದ್ದರೆ, ಇನ್ನುಳಿದ ಶೇ 33ರಷ್ಟು ಬುಕ್ಕಿಂಗ್​​​​​ಗಳು ಮೆಟ್ರೋ ನಗರಗಳಲ್ಲಿ ಆಗಿವೆ ಎಂದು ಹೊಸ ವರದಿಯೊಂದು ಬುಧವಾರ ತಿಳಿಸಿದೆ. ಆನ್​​​ಲೈನ್ ಬಸ್ ಟಿಕೆಟಿಂಗ್ ಪ್ಲಾಟ್ ಫಾರ್ಮ್ ರೆಡ್ ಬಸ್ ಪ್ರಕಾರ, ಈ ಪ್ರವೃತ್ತಿಯು ಶ್ರೇಣಿ 2 ಮತ್ತು ಶ್ರೇಣಿ 3 ನಗರಗಳ ಹೆಚ್ಚುತ್ತಿರುವ ಪ್ರಾಮುಖ್ಯತೆಯನ್ನು ಮತ್ತು ಮೆಟ್ರೋ ಅಲ್ಲದ ಪ್ರದೇಶಗಳಲ್ಲಿ ಹೆಚ್ಚಿದ ಡಿಜಿಟಲ್ ಬಳಕೆಯನ್ನು ತೋರಿಸುತ್ತದೆ.

"ಈ ವರದಿಯು ಬಸ್ ಸಾರಿಗೆ ಉದ್ಯಮದಲ್ಲಿ ಕ್ರಾಂತಿಯನ್ನುಂಟು ಮಾಡುವ ನಮ್ಮ ಬದ್ಧತೆ ಸೂಚಿಸುತ್ತದೆ. ಅಲ್ಲದೇ ಈ ಹಿಂದೆ ಲಭ್ಯವಿಲ್ಲದ ನಿಖರವಾದ ಅಂಕಿ - ಅಂಶಗಳು ಮತ್ತು ಪ್ರವೃತ್ತಿಗಳನ್ನು ನಮ್ಮ ವರದಿ ಬಹಿರಂಗಪಡಿಸಿದೆ" ಎಂದು ರೆಡ್ ಬಸ್ ಸಿಇಒ ಪ್ರಕಾಶ್ ಸಂಗಮ್ ಹೇಳಿದರು.

ವರದಿಯ ಪ್ರಕಾರ, 18 ರಿಂದ 25 ವರ್ಷ ವಯಸ್ಸಿನ ಶೇ 29 ರಷ್ಟು ಮತ್ತು 26 ರಿಂದ 36 ವರ್ಷ ವಯಸ್ಸಿನ ಶೇ 39 ರಷ್ಟು ಯುವ ಪ್ರಯಾಣಿಕರು ಅತ್ಯಧಿಕ ಆನ್​ಲೈನ್ ಬಸ್ ಟಿಕೆಟ್ ಬುಕ್ ಮಾಡಿದ್ದಾರೆ. ಎಲ್ಲ ಪ್ರಯಾಣಿಕರ ಪೈಕಿ ಸುಮಾರು ಶೇ 33 ರಷ್ಟು ಮಹಿಳೆಯರು ಮತ್ತು ಶೇ 52 ರಷ್ಟು ಬುಕ್ಕಿಂಗ್​​ ಏಕವ್ಯಕ್ತಿ ಪ್ರಯಾಣಿಕರಿಗಾಗಿ ಬುಕ್ಕಿಂಗ್​​ ಆಗಿವೆ.

ಇದಲ್ಲದೇ, ಎಕ್ಸ್ ಪ್ರೆಸ್ ವೇ ಅಭಿವೃದ್ಧಿಯು ಬಸ್ ಸೀಟ್ ಬುಕ್ಕಿಂಗ್​​​ನಲ್ಲಿ ಶೇಕಡಾ 200 ರಷ್ಟು ಬೆಳವಣಿಗೆಗೆ ಕಾರಣವಾಗಬಹುದು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ರಾಷ್ಟ್ರೀಯ ಹೆದ್ದಾರಿ ಜಾಲವು ಕಳೆದ ದಶಕದಲ್ಲಿ ಶೇಕಡಾ 60 ರಷ್ಟು ಏರಿಕೆಯಾಗಿ 2023 ರಲ್ಲಿ 1,46,145 ಕಿ.ಮೀ.ಗಳನ್ನು ಹೆಚ್ಚಾಗಿದೆ ಮತ್ತು ಇದರ ಪರಿಣಾಮವಾಗಿ ಬಸ್​​ಗಳ ಪ್ರಯಾಣದ ಸಮಯ ಗಣನೀಯವಾಗಿ ಕಡಿಮೆಯಾಗಿದೆ ಎಂದು ವರದಿ ತಿಳಿಸಿದೆ.

ಮಹಾರಾಷ್ಟ್ರ ಮತ್ತು ಗೋವಾ ಶೇ 82ರಷ್ಟು ಬಸ್ ಸಂಚಾರ ದಟ್ಟಣೆಯೊಂದಿಗೆ ಅಗ್ರಸ್ಥಾನದಲ್ಲಿದ್ದರೆ, ಮಧ್ಯಪ್ರದೇಶ ಮತ್ತು ಛತ್ತೀಸ್​​​ಗಢದ ಶೇ 67ರಷ್ಟು ಬಸ್ ಸಂಚಾರ ದಟ್ಟಣೆಯೊಂದಿಗೆ ಕೊನೆಯ ಸ್ಥಾನದಲ್ಲಿವೆ. ಅಖಿಲ ಭಾರತ ಬಸ್ ಸಂಚಾರ ದಟ್ಟಣೆಯ ದರವು ಶೇಕಡಾ 77 ರಷ್ಟಿದೆ. ನವೆಂಬರ್ ಮತ್ತು ಡಿಸೆಂಬರ್ (2023) ಅವಧಿಯಲ್ಲಿ ಪ್ರಯಾಣಿಸಿದ ಪ್ರಯಾಣಿಕರ ಸಂಖ್ಯೆ 36.06 ಮಿಲಿಯನ್ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಇದನ್ನೂ ಓದಿ : ಷೇರು ಮಾರುಕಟ್ಟೆಯಲ್ಲಿ ಭಾರಿ ಕುಸಿತ: ಒಂದೇ ದಿನ 13 ಲಕ್ಷ ಕೋಟಿ ರೂ. ನಷ್ಟ