বোকাখাতৰ নাহৰজান চাহ বাগিচাৰ 18 নং লাইনত উদ্ধাৰ নৰকংকাল - বোকাখাত আৰক্ষী

বোকাখাত, 25 ফেব্ৰুৱাৰী : শনিবাৰে বোকাখাত নাহৰজান চাহ বাগিচাৰ ১৮ নং লাইনত উদ্ধাৰ এটা নৰকংকাল ৷ নৰকংকাল উদ্ধাৰ হোৱা ঘটনাক লৈ বাগিচাখনত বিৰাজ কৰিছে তীব্ৰ চাঞ্চল্য ৷ চাহ বাগিচাখনৰ পৰিচালকে অঞ্চলটোত হাবি চাফা কৰিবলৈ কামত লগোৱা চাৰি শ্ৰমিকে প্ৰথমতে এই কংকালটো প্ৰত্যক্ষ কৰে । তাৰ পাচতে অঞ্চলটোত সৃষ্টি হয় এক আতংকময় পৰিৱেশৰ ৷

লগে লগে শ্ৰমিকসকলে চাহ বাগিচা পৰিচালকক উক্ত ঘটনাৰ বিষয়ে অৱগত কৰে । বাগিচা পৰিচালকে ঘটনা স্থলীত উপস্থিত হৈ নৰকংকালটো প্ৰত্যক্ষ কৰি বোকাখাত আৰক্ষীক খবৰ দিয়ে ৷ খবৰ পোৱাৰ মাত্ৰে বোকাখাত আৰক্ষী থানাৰ এটা আৰক্ষীৰ দল ঘটনাস্থলীত উপস্থিত হৈ নৰকংকালটো উদ্ধাৰ কৰে ৷ লগতে মৰণোত্তৰ পৰীক্ষাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰে আৰু আৰম্ভ কৰে ঘটনাৰ তদন্ত ।

উল্লেখ্য যে, কংকালটোৰ তলৰ অংশত লাগি আছে সেউজীয়া ৰঙৰ এটা হাফপেন্ট আৰু ওপৰৰ অংশত কমলা ৰঙৰ টি-চাৰ্ট । সাজপাৰলৈ লক্ষ্য কৰি কংকালটো পুৰুষৰ বুলি অনুমান কৰা হৈছে । কিন্তু কেনেকৈ এই স্থানত নৰকংকালটো আহিল নে কোনো লোকে হত্যা কৰি মৃতদেহটো এইটো পেলাই থৈছিল সেয়া বৰ্তমানো পোহৰলৈ অহা নাই ৷

লগতে পঢ়ক : পৰিত্যক্ত বাসগৃহত একে পৰিয়ালৰে 5 জনৰ নৰকংকাল উদ্ধাৰ