নলবাৰী, 7 মে’ : মঙলবাৰৰ দিনটোত ৰাজ্যত অব্যাহত আছে তৃতীয় পৰ্যায়ৰ ভোটগ্ৰহণ প্ৰক্ৰিয়া ৷ দিনৰ 11 বজালৈকে সম্পূৰ্ণ হৈছে 27.34 % ভোটদান ৷ প্ৰতিকূল বতৰকো নেওচি ৰাইজে স্বতঃস্ফুৰ্তভাৱে ওলাই আহিছে গণতান্দ্ৰিক অধিকাৰ সাব্যস্ত কৰিবলৈ ৷
উন্নয়নৰ বতৰা লৈ তৃতীয়বাৰৰ বাবে নৰেন্দ্ৰ মোদীৰ নেতৃত্বত চৰকাৰ গঠনৰ সপোন দেখা বিজেপিয়ে প্ৰকৃতাৰ্থত কৰিব পাৰিছেনে উন্নয়ন ? এয়া পৰিস্ফুট হৈ পৰিছে পূৰ্বৰ মঙলদৈ লোকসভা সমষ্টিৰ সাংসদ দিলীপ শইকীয়াৰ গৃহ গাঁও মোমাইতোলাত ৷ গাঁৱখনৰ বহুসংখ্যক ৰাইজে প্ৰতিবাৰেই ভোটগ্ৰহণৰ দিনা এডাল সাঁকো পাৰ হৈ ভোটগ্ৰহণ কেন্দ্ৰলৈ যায় ৷
নিৰ্বাচন আহে, নিৰ্বাচন যায় ৷ কিন্তু সাঁকোখনৰ স্থানতহে হৈ নুঠে এখনো দলং ৷ যাৰ বাবে অতি বিপদশংকুলভাৱে যাতায়াত কৰি ভোট প্ৰদান কৰিব ওলাই আহে জনতা ৷ বৰলীয়া নৈৰ পাৰত অৱস্থিত মোমাইতোলাত বাৰে বাৰে হৈ অহা এনে কাৰ্যই স্থানীয় লোকসকলক চিন্তিত কৰি তুলিছে ৷ তাৰপিছতো কিন্তু এনেদৰেই সচেতন নাগৰিকৰ পৰিচয় দি গাঁওবাসীয়ে প্ৰতিবাৰ নিৰ্বাচনতে সাব্যস্ত কৰে ভোটাধিকাৰ ৷
একাংশ মহিলাই আকৌ কোলাত শিশুক লৈ সাঁকো পাৰ হৈ ভোটদানৰ বাবে যোৱা পৰিলক্ষিত হৈছে ৷ এতিয়া বাৰিষাৰ সময়, বাৰিষাৰ বানে পুনৰ উটুৱাই নিব সাঁকোখন ৷ মুঠতে অঞ্চলটোত ৰাইজৰ দুৰ্গতিৰ সীমা নোহোৱা হৈছে ৷