বিশ্বনাথ, ১৭ মে':কেৱল পাকঘৰতে সীমাৱদ্ধ নহয় মহিলা । মহিলাও হ'ব পাৰে স্বাৱলম্বী । পৰিয়ালৰ বাবে কৰিব পাৰে জীৱিকাৰ সন্ধান । গ্ৰামাঞ্চলৰ মহিলা বুলিলেই সাধাৰণতে সকলোৱে ধাৰণা কৰে যে পাকঘৰৰ সমস্ত দায়িত্ব লৈ পৰিয়ালৰ আবদাল মাৰি আজৰি নোপোৱা এগৰাকী গৃহিণী । কিন্তু, পৰিয়ালৰ সকলো আবদাল মাৰিও স্বাৱলম্বী হৈ পৰিয়ালৰ বাবে জীৱিকাৰ সন্ধান কৰিব পাৰে এগৰাকী মহিলাই ।
স্বাৱলম্বিতাৰ অনন্য নিদৰ্শন প্ৰণামী শইকীয়া দেৱী । জীৱিকা সখীৰ পৰা বুলিছে স্বাৱলম্বিতাৰ বাট । হয় ঘৰৰ সমস্ত আবদাল মৰাৰ লগতে পশুপালনেৰে স্বাৱলম্বী হোৱাৰ প্ৰয়াস কৰিছে বিশ্বনাথৰ সাকোমঠা উন্নয়ন খণ্ডৰ প্ৰণামী শইকীয়া দেৱীয়ে । এটা আত্মসহায়ক গোটৰ এগৰাকী সদস্যা প্ৰণামীয়ে প্ৰথমে ৫১ হাজাৰ টকা ঋণ লৈ আৰম্ভ কৰিছিল উন্নত প্ৰজাতিৰ 'লেয়াৰ' নামৰ কুকুৰা পালন । ইয়াৰ পাছতে গাহৰি ফাৰ্ম আদিও আৰম্ভ কৰে উদ্যমী মহিলাগৰাকীয়ে ।
ইফালে প্ৰণামী দেৱীয়ে একমাত্ৰ কুকুৰা পালনতে ব্যস্ত নাথাকি নিজৰ ঘৰত বিভিন্ন ধৰণৰ গহণা তৈয়াৰ কৰি অনলাইন যোগে বিক্ৰী কৰি আহিছে । তদুপৰি ঘৰতে প্ৰণামি দেৱীয়ে এটা বিভিন্ন সামাজিক অনুষ্ঠানত ব্যৱহৃত প্লেট আদি তৈয়াৰ কৰা মেচিন আনি আৰম্ভ কৰিছে তামোলৰ ঢকুৱাৰে প্লেট আদিৰ দৰে বিভিন্ন সামগ্ৰীৰ ব্যৱসায় ।