স্প’ৰ্টছ ডেস্ক: ভাৰতৰ ভূমিতে টেষ্ট শৃংখলাত নিউজিলেণ্ডৰ বিৰুদ্ধে পৰাজয়ৰ পিছত সমালোচনাৰ সন্মুখীন হৈছে টীম ইণ্ডিয়া ৷ অধিকাংশ অনুৰাগীয়ে দলটোৰ মুখ্য প্ৰশিক্ষক গৌতম গম্ভীৰৰ লগতে শীৰ্ষ বহু কেইগৰাকী ক্ৰিকেটাৰৰ সন্দৰ্ভত উত্থাপন কৰিছে প্ৰশ্ন ৷
তদুপৰি, দলটোৰ শীৰ্ষ খেলুৱৈসকলে ভাৰতৰ মুখ্য ঘৰুৱা টুৰ্ণামেণ্ট ৰঞ্জী ট্ৰফীত কিহৰ বাবে অংশগ্ৰহণ কৰা নাই, তাক লৈও প্ৰশ্ন উত্থাপন কৰিছে ৷
অভিলেখৰ বাবে টীম ইণ্ডিয়াৰ তাৰকা বেটছমেন তথা প্ৰাক্তন অধিনায়ক বিৰাট কোহলীয়ে নিউজিলেণ্ডৰ বিৰুদ্ধে বেটিং কৰিবলৈ সংগ্ৰাম কৰা দেখা গৈছিল ৷ মুম্বাইৰ ৱাংখেড়ে ষ্টেডিয়ামৰ প্ৰত্যাহ্বানপূৰ্ণ পিটচত বেটছমেনগৰাকীয়ে মাথো একক অংকৰ স্ক’ৰহে সংগ্ৰহ কৰিবলৈ সক্ষম হৈছিল ৷
বিৰাট কোহলীয়ে শেষবাৰৰ বাবে 2012 চনত খেলিছিল ৰঞ্জী ট্ৰফী
ঘৰুৱা ক্ৰিকেটত দিল্লীক প্ৰতিনিধিত্ব কৰা কোহলীয়ে শেষবাৰৰ বাবে 2012 চনত ৰঞ্জী ট্ৰফীত অংশগ্ৰহণ কৰিছিল ৷ কোহলীয়ে শেষবাৰৰ বাবে ভাৰতৰ প্ৰাৰম্ভিক ঘৰুৱা প্ৰতিযোগিতাত খেলাৰ প্ৰায় 12 বছৰ অতিক্ৰম কৰিছে ৷
বিৰাট-ৰোহিতৰ ৰঞ্জীত অংশগ্ৰহণৰ সন্দৰ্ভত দাবী উত্থাপন
শেহতীয়াকৈ নিজৰ বৃত্তিত 50 বছৰ সম্পূৰ্ণ কৰা প্ৰবীণ ক্ৰিকেট ভাষ্যকাৰ মিলিন্দ ৱাগলে সামাজিক মাধ্যমত প্ৰকাশ কৰিছে নিজৰ মতামত ।
ৰোহিত শৰ্মা আৰু বিৰাট কোহলী (IANS Photo) "ৰোহিত শৰ্মা আৰু বিৰাট কোহলীয়ে অষ্ট্ৰেলিয়া ভ্ৰমণৰ পৰা আঁতৰি ঘৰুৱা ক্ৰিকেট খেলিব লাগে ৷ আত্মবিশ্বাস অৰ্জন কৰিব লাগে আৰু তাৰ পিছত ভাৰতীয় দললৈ প্ৰত্যাৱৰ্তন কৰিব লাগে ৷ তেওঁলোক এতিয়াও বিশ্বমানৰ খেলুৱৈ" বুলি ৱাগলে সামাজিক মাধ্যমত প্ৰকাশ কৰে ৷
ইটিভি ভাৰতৰ সৈতে হোৱা বাৰ্তলাপত ৱাগলে কয় যে, "ৰোহিত আৰু বিৰাট দুয়োৱে অৱসৰৰ বিষয়ে চিন্তা কৰা উচিত নহয় । ইয়াৰ পৰিৱৰ্তে তেওঁলোকে ৰঞ্জী ট্ৰফীত খেলাৰ লগতে আত্মবিশ্বাস অৰ্জন কৰাত গুৰুত্ব দিব লাগে ৷ কিয়নো তেওঁলোক আমাৰ সৰ্বশ্ৰেষ্ঠ প্ৰতিভাৰ ভিতৰত অন্যতম । অন্তিমখন ৰঞ্জী ট্ৰফীৰ খেলত বিৰাটে উত্তৰ প্ৰদেশৰ বিৰুদ্ধে মাত্ৰ 14 আৰু 43 ৰাণ সংগ্ৰহ কৰিছিল ৷ এই খেলখনত ভাৰতৰ প্ৰাক্তন বলাৰ প্ৰবীণ কুমাৰ আৰু ভুৱনেশ্বৰ কুমাৰকো অন্তৰ্ভুক্ত কৰা হয়" ৷
ৰোহিতে 2015 চনত খেলিছিল অন্তিমখন ৰঞ্জী মেচ
ৰোহিত শৰ্মাৰ ক্ষেত্ৰতো দেখা গৈছে একেই দৃশ্য । ভাৰতৰ অধিনায়কগৰাকীয়ে মুম্বাইৰ হৈ ৰঞ্জী খেলত অংশগ্ৰহণ কৰাৰ বহু বছৰ পাৰ হ'ল । মুম্বাইৰ হৈ তেওঁৰ অন্তিমখন খেল 2015 চনৰ নৱেম্বৰত উত্তৰ প্ৰদেশৰ বিৰুদ্ধে আছিল ।
ৰোহিতে নিজমুখে স্বীকাৰ কৰিছিল যে, তেওঁ নিজৰ বেটিং মূল্যায়ন কৰিব লাগিব । খেলখনৰ পিছত সংবাদমেলত ক্ৰিকেটাৰজনে মুকলিকৈ কয়, "মই স্বীকাৰ কৰোঁ যে মই এই শৃংখলাত ভাল বেটিং কৰা নাই । কেৱল এই দুটা শৃংখলাত মই মাজত পৰ্যাপ্ত সময় পোৱা নাই। কিন্তু বাংলাদেশৰ আগৰ শৃংখলাটোত মই ক্ৰিজত যথেষ্ট সময় পাইছিলো" ৷
ৰোহিত-বিৰাটৰ শেহতীয়া প্ৰদৰ্শন
বাংলাদেশ আৰু নিউজিলেণ্ডৰ বিৰুদ্ধে টেষ্ট শৃংখলাত ৰোহিতৰ শেহতীয়া প্ৰদৰ্শন আশাব্যঞ্জক নাছিল । তেওঁ বাংলাদেশৰ বিৰুদ্ধে 4 টা ইনিংছত মাত্ৰ 10.50 গড়ৰ সৈতে 42 ৰাণ সংগ্ৰহ কৰিছিল ৷ আনহাতে, নিউজিলেণ্ডৰ বিৰুদ্ধে 6 টা ইনিংছত 15.16 গড়ে সংগ্ৰহ কৰিছিল মাত্ৰ 91 ৰাণ । বৰ্তমান 14 খন টেষ্টত ক্ৰিকেটাৰগৰাকীৰ গড় হৈছে 33.32, য’ত আছে 3 টা শতক আৰু 4 টা অৰ্ধশতক ।
কোহলীৰ প্ৰদৰ্শনো আছিল হতাশাজনক ৷ তেওঁ 9 খন টেষ্টৰ 16 টা ইনিংছত 37.66 গড়ে মাত্ৰ 561 ৰাণ সংগ্ৰহ কৰিছিল, য’ত আছে এটা শতক আৰু 3 টা অৰ্ধশতক ।
চলিত ৰঞ্জী ট্ৰফীৰ পৰৱৰ্তী খেলসমূহ সমাগত ৷ তাৰ সমান্তৰালকৈ প্ৰশ্ন উত্থাপন হৈছে যে শীৰ্ষ খেলুৱৈসকলে অংশগ্ৰহণ কৰিব নেকি ? এয়া সম্প্ৰতি এক লাখটকীয়া প্ৰশ্ন, যাৰ উত্তৰ মাথো বি চি চি আইয়েহে দিব পাৰে বুলি প্ৰবীণ ক্ৰিকেট ভাষ্যকাৰ মিলিন্দ ৱাগলে কয় ৷
লগতে পঢ়ক:টেষ্ট শৃংখলাত পৰাস্ত; পইণ্ট তালিকাত শীৰ্ষস্থান হেৰুৱালে ভাৰতে
