মৰাণত সদৌ অসম ভিত্তিত শিশু টাইকোৱাণ্ডো প্ৰতিযোগিতাৰ সফল সামৰণি

শ্ৰেষ্ঠ দলৰ সন্মান মৰাণ জিলা টাইকোৱাণ্ডো দললৈ, দ্বিতীয়-তৃতীয় স্থানত ডিব্ৰুগড় আৰু যোৰহাট ৷

ডিব্ৰুগড়: মৰাণত চাৰিদিনীয়াকৈ অনুষ্ঠিত দ্বিতীয় সদৌ অসম শিশু টাইকোৱাণ্ডো প্ৰতিযোগিতা ২০২৪ ৰ মঙলবাৰে নিশা সফল সামৰণি পৰে ৷ টাইকোৱাণ্ডো মাৰ্চিয়েল আৰ্টছ আৰু স্পৰ্টছ এছ'চিয়েচন মৰাণৰ উদ্যোগত আৰু মৰাণবাসীৰ সহযোগত ২১ ডিচেম্বৰৰ পৰা মৰাণৰ তিলৈনগৰ গ্ৰাম্য বজাৰ প্ৰেক্ষাগৃহত অনুষ্ঠিত হয় এই প্ৰতিযোগিতাখন ৷

দ্বিতীয় সদৌ অসম শিশু টাইকোৱাণ্ডো প্ৰতিযোগিতাখনত অসমৰ ২০ খন জিলাৰ ৫ শতাধিক প্ৰতিযোগীয়ে অংশগ্ৰহণ কৰে ৷ প্ৰতিযোগিতাত শ্ৰেষ্ঠ দল হিচাপে বিবেচিত হয় মৰাণ জিলা টাইকোৱাণ্ডো সন্থা ৷ আনহাতে দ্বিতীয় শ্ৰেষ্ঠ দল হিচাপে ডিব্ৰুগড় আৰু তৃতীয় শ্ৰেষ্ঠ দল হিচাপে যোৰহাট দল নিৰ্বাচিত হয় ৷

প্ৰতিযোগিতাৰ সামৰণি অনুষ্ঠানত মন্ত্ৰী যোগেন মহন, জ্যোতি চিত্ৰবনৰ উপাধ্যক্ষ সুনীল ৰাজকোঁৱৰ, টাইকোৱাণ্ডো মাৰ্চিয়েল আৰ্টছ আৰু স্পৰ্টছ এছ'চিয়েচন, অসমৰ ৰাজ্যিক সমিতিৰ সভাপতি-সম্পাদক বিশিষ্ট অতিথি হিচাপে উপস্থিত থাকে ৷ প্ৰতিযোগিতাখনৰ লগত সংগতি ৰাখি প্ৰকাশ কৰা স্মৃতিগ্ৰন্থ "ক্ৰীড়াঙ্গন" উন্মোচন কৰে মন্ত্ৰী যোগেন মহনে ৷

অনুষ্ঠানত অংশগ্ৰহণ কৰি মন্ত্ৰী যোগেন মহনে কয়, "শিশুসকলেই হৈছে দেশৰ ভৱিষ্যৎ । শিশুসকলক সুস্থ মানসিকতাৰে মানৱ সম্পদৰূপে গঢ়ি তোলাৰ ক্ষেত্ৰত খেলে গুৰুত্বপূৰ্ণ ভুমিকা পালন কৰে । এই প্ৰতিযোগিতাত ২০ খন জিলাৰ ৫ শতাধিক প্ৰতিযোগীয়ে অংশগ্ৰহণ কৰি ৰাইজক ক্ৰীড়াৰ জড়িয়তে আমোদ দিছে ।"

তেওঁ আৰু কয়, "ক্ৰীড়াই সমাজ-জাতি গঢ়াৰ লগতে ক্ৰীড়াৰ জড়িয়তে নিজক প্ৰতিষ্ঠা কৰিব পৰা যায় । ক্ৰীড়াৰ ক্ষেত্ৰখন আমি সকলোৱেই মিলি অধিক জনপ্ৰিয় কৰিব লাগিব । এতিয়া টাইকোৱাণ্ডো খেল আত্মৰক্ষাৰ কৌশল হিচাপে বিবেচিত হৈছে । ৰাষ্ট্ৰীয়-আন্তঃৰাষ্ট্ৰীয় পৰ্যায়ত সফলতা লাভ কৰা খেলুৱৈসকলক চৰকাৰে সংস্থাপন দিয়াৰ ব্যৱস্থা কৰিছে । শিশু খেলুৱৈসকলক ক্ৰিকেটৰ ক্ষেত্ৰত আগুৱাই যাবলৈ আমি উৎসাহিত কৰিব লাগিব ।"

লগতে পঢ়ক:স্বৰ্গদেউ সৰ্বানন্দ সিংহ সোঁৱৰণি সৰ্বভাৰতীয় আমন্ত্ৰণমূলক প্ৰাইজমানি ফুটবল প্ৰতিযোগিতা আৰম্ভ