গোলাঘাট : গোলাঘাট টেনিছ ক্লাবৰ উদ্যোগত যোৱা ৮ জানুৱাৰীৰ পৰা অসম ভিত্তিত অনুষ্ঠিত জুনিয়ৰ টেনিছ প্ৰতিযোগিতাৰ দেওবাৰে সামৰণি পৰে । চাৰিটা শাখাত অনুষ্ঠিত কৰা এই প্ৰতিযোগিতাত অসমৰ বিভিন্ন প্ৰান্তৰ শতাধিক খেলুৱৈয়ে অংশগ্ৰহণ কৰে ।
উক্ত প্ৰতিযোগিতাত ১০ বছৰ অনুৰ্ধ্ব ল'ৰাৰ শাখাত ধনুশ মহন্ত আৰু ছোৱালীৰ শাখাত গুৱাহাটীৰ ধানীক্ষা মহন্ত, ১২ বছৰ অনুৰ্ধ্ব ল'ৰাৰ শাখাত গোলাঘাটৰ আৰিয়ান ভৰালী,ছোৱালী শাখাত নুমলীগড়ৰ যশশ্ৰী বৰা, ১৪ বছৰ অনুৰ্ধ্ব ল'ৰাৰ শাখাত নুমলীগড়ৰ অনিৰুদ্ধ বৰা, ছোৱালী শাখাত ধানিক্ষা মহন্ত, ১৮ বছৰ অনুৰ্ধ্ব ল'ৰাৰ শাখাত অভয় ভৰালী, ছোৱালী শাখাত নবিহা মৰিয়মে খিতাপ অৰ্জন কৰিবলৈ সক্ষম হয় ।
আনহাতে,১৮ বছৰ অনুৰ্ধ্ব ল'ৰাৰ যুটীয়া শাখাত গোলাঘাটৰ অভয় ভৰালী আৰু শ্ৰীমন্ত গগৈ,ছোৱালী শাখাত গোলাঘাটৰ নবিহা মৰিয়ম আৰু আৰিয়ানা কাকতিয়ে খিতাপ অৰ্জন কৰে । প্ৰতিযোগিতাখনিত প্ৰতিভাবান খেলুৱৈৰ বঁটা ল'ৰাৰ শাখাত গোলাঘাটৰ হৃদয়ৰাগ শইকীয়া আৰু ছোৱালীৰ শাখাত গোলাঘাটৰ অধিশ্ৰী বৰুৱাই লাভ কৰে ।
উক্ত বঁটা প্ৰদান অনুষ্ঠানত গোলাঘাট টেনিছ ক্লাবৰ উপ-সভাপতি তথা দেৱৰাজ মহাবিদ্যালয়ৰ প্ৰাক্তন অধ্যক্ষ ড৹পুতুল চন্দ্ৰ শইকীয়া,ৰবি জ্যোতি বৰুৱা, নুমলীগড় শোধনাগাৰৰ সামাজিক উন্নয়ন বিভাগৰ বিষয়া বিশ্বজিৎ বৰা, ষ্টেট বেংক গোলাঘাট শাখাৰ এই জি এছ বিপ্লৱ কুমাৰ গোস্বামী, জ্যেষ্ঠ ক্ৰীড়া সাংবাদিক ৰূপক দত্ত, চিকু ৰূপা হাজৰিকা আদিয়ে বিশিষ্ট অতিথি হিচাপে উপস্থিত থাকি বঁটা সমূহ প্ৰদান কৰে ।
উক্ত প্ৰতিযোগিতা সম্পৰ্কে গোলাঘাট টেনিছ ক্লাবৰ সম্পাদক ৰাজীৱ শৰ্মাই কয়, "এই প্ৰতিযোগিতাত অসমৰ বিভিন্ন প্ৰান্তৰ পৰা ১০০ ৰো অধিক খেলুৱৈয়ে অংশগ্ৰহণ কৰিছে । ৮ জানুৱাৰীৰ পৰা আৰম্ভ হোৱা এই টেনিছ প্ৰতিযোগিতা সুকলমে সম্পন্ন হৈছে ।"
