গুৱাহাটী,৪ জুন :আজি ঘোষণা হ'ব লোকসভা নিৰ্বাচন । সমগ্ৰ দেশৰ লগতে অসমৰো বিভিন্ন জিলাত ভোটগণনা প্ৰক্ৰিয়া আৰম্ভ হৈছে । ভোটগণনা কেন্দ্ৰবোৰৰ বাহিৰত প্ৰতিটো দলৰে কৰ্মী তথা সমৰ্থকসকলে কৌতূহলী মনেৰে নিৰ্বাচনৰ ফলাফললৈ অপেক্ষা কৰি থকা দেখা গৈছে । শেহতীয়া ফলাফলৰ প্ৰৱণতা অনুসৰি বিজেপিয়ে ২০০ ৰো অধিক আসনত আগবাঢ়ি আছে । অসমৰো কেইবাখনো আসনত বিজেপিয়ে আগবাঢ়ি আছে । প্ৰতিবেদন প্ৰস্তুত কৰাৰ সময়লৈ অসমৰ ১৪ খন আসনৰ ভিতৰত ৯ খনতে বিজেপি মিত্ৰজোঁটে অগ্ৰগতি লাভ কৰিছে ।
এনে পৰিস্থিতিত বিজেপি কাৰ্যালয় আৰু কৰ্মীসকলৰ মাজত ব্যাপক উছাহ দেখিবলৈ পোৱা গৈছে । একাংশ স্থানত বিজেপিয়ে ইতিমধ্যে বিজয় উৎসৱৰ প্ৰস্তুতি চলাইছে । গুৱাহাটীৰ বশিষ্ঠস্থিত ভাৰতীয় জনতা পাৰ্টীৰ উত্তৰ-পূৱৰ মুখ্য কাৰ্যালয়তো উখল-মাখল পৰিৱেশে বিৰাজ কৰিছে । পুৱাৰে পৰা কাৰ্যালয়ত নাম-প্ৰসংগ চলি আছে । বিজেপিৰ ভাল ফলাফলৰ কামনাৰে ভকতসকলে নাম-কীৰ্তন কৰিছে ।