মাজুলী : সমগ্ৰ দেশ তেতিয়া উলহ-মালহেৰে ৭৬ সংখ্যক গণৰাজ্য দিৱস উদযাপনত ব্যস্ত হৈ আছিল । দেওবাৰৰ দিনটোত মন্ত্ৰী, বিধায়ক তথা চৰকাৰী বিষয়াসকলৰো গণৰাজ্য দিৱস উপলক্ষে আহৰি নাছিল । সকলো ভীষণ ব্যস্ত আছিল গণৰাজ্য দিৱসৰ পতাকা উৰুৱাই সাফল্য আৰু বিকাশৰ খতিয়ান দিয়াত ৷ সেই সময়তে ঘটি গ'ল ঘটনাটো ৷ পৃথিৱীৰ বৃহত্তম নদীদ্বীপ মাজুলীত দেখা গ'ল এজন লোকে চাইকেলত কঢ়িয়াই আনিছে পৰিয়ালৰ এগৰাকী সদস্যৰ মৃতদেহ । যি দৃশ্যই সকলোকে ভাবুক কৰি তুলিলে । গণৰাজ্য দিৱসৰ দিনটোতে মাজুলীত দেখা গ'ল এনে হৃদয়বিদাৰক দৃশ্য ।
চাইকেলেৰে কিয় নিবলগীয়া হ'ল মৃতদেহ
মাজুলীৰ লুইতৰ ওপৰত থকা লুইত খাবলু দলঙৰ দুৰৱস্থাৰ বাবেই লোকজনে চাইকেলত বান্ধি নিব লগা হ'ল মৃতদেহ । লুইত খাবলু নগৰ গাঁৱৰ জীৱন দাস নামৰ এজন লোকৰ মৃত্যু হৈছিল । কিন্তু তেওঁৰ ঘৰলৈ যোৱা খাবলু দলঙৰ দুৰৱস্থাৰ বাবে কোনো বাহন যাব নোৱাৰে । যাৰ বাবে তেওঁৰ পৰিয়ালৰ লোকে চাইকেলত বান্ধিয়ে মৃতদেহটো ঘৰলৈ লৈ গ'ল । লক্ষণীয়ভাৱে লুইত খাবলুবাসীৰ সুবিধা হোৱাকৈ পকী দলঙৰ কাম চলি আছে যদিও প্ৰায় দুটা বছৰে সম্পূৰ্ণ হোৱা নাই পকী দলংখনৰ কাম । অতি লেহেমীয়াকৈ দলঙৰ নিৰ্মাণকাৰ্য চলি থকাত এতিয়া সমস্যাত পৰিছে অঞ্চলটোৰ লোকসকল ।
লুইত খাবলুবাসীৰ দুৰ্দশা
যি সময়ত চৰকাৰে উন্নয়নৰ ঢাক-ঢোল বজাই আছে সেই সময়ত এখন দলঙৰ বাবে এনেদৰে মৃতদেহ চাইকেলত বান্ধি লৈ যাবলগীয়া হোৱাটো অতি দুৰ্ভাগ্যজনক । অথচ এইখন ঠাইৰ পৰাই বিধায়ক হৈ প্ৰথমে মুখ্যমন্ত্ৰীৰ চকীত আৰু এতিয়া কেন্দ্ৰীয় মন্ত্ৰীৰ আসনত বহিছে সৰ্বানন্দ সোণোৱালৰ দৰে দিগ্গজ নেতা । প্ৰতিবাৰে নিৰ্বাচনৰ প্ৰাকক্ষণত দেশৰ বিশিষ্ট নেতাসকলৰো দৃষ্টি এই মাজুলীতে নিবদ্ধ হৈ থাকে । কিন্তু মাজুলীৰ সাধাৰণ লোকৰ আজি এই অৱস্থা ।
লুইত খাবলুৰ ৰাইজে ক্ষোভ প্ৰকাশ কৰি কয়, "আজি দলঙৰ এনে অৱস্থাৰ বাবে এনেদৰে মৃতদেহ চাইকেলত বান্ধি আনিব লগা হৈছে । যদি এবছৰৰ ভিতৰত পকী দলঙৰ কাম সম্পূৰ্ণ নহয় তেনেহ'লে আহি থকা দিনত ভোট বৰ্জনৰ দৰে সিদ্ধান্ত গ্ৰহণ কৰিম । দলং নিৰ্মাণ কৰি থকা প্ৰতিষ্ঠানে গাফিলতি কৰি আছে যাৰ বাবে দলঙৰ কাম সম্পূৰ্ণ হোৱা নাই । গতিকে অতি সোনকালে এই বিষয়টোৰ ওপৰত মুখ্যমন্ত্ৰীয়ে হস্তক্ষেপ কৰিব লাগে ।" আচলতে মাজুলীবাসীয়েহে এই দুৰ্দশা হয়তো বুজিব পাৰিব । কিন্তু তেওঁলোকৰ এই সমস্যাবোৰৰ অন্ত পৰিবনে ? সেয়া এক ডাঙৰ প্ৰশ্ন ।
লগতে পঢ়ক :মুখ্যমন্ত্ৰীয়ে আধাৰশিলা স্থাপন কৰিবলগীয়া স্থানৰ কাষতে ওলাল মৃতদেহ - BODY RECOVERED IN DIBRUGARH
