চিটাৰা ডেস্ক, 17 জুলাই : অৱশেষত বিবাহপাশত আবদ্ধ হ’ল অনন্ত আম্বানী আৰু ৰাধিকা মাৰ্চেণ্ট । এক আড়ম্বৰপূৰ্ণ অনুষ্ঠানত দুয়োৰে বিয়া সম্পন্ন হয় ১২ জুলাইত । দুটাকৈ প্ৰি-ৱেডিং ইভেণ্টৰ পাচত অনুষ্ঠিত হয় তেওঁলোকৰ বিয়া ৷ অৱশ্যে বিয়াৰ উদযাপন এতিয়াও চলি আছে । মঙলবাৰে (১৬ জুলাই) নৱ-বিবাহিত দম্পতী গুজৰাটৰ জামনগৰত উপস্থিত হয় আৰু তাত তেওঁলোকক উষ্ম আদৰণি জনোৱা হয় । জামনগৰতেই আয়োজন কৰা হৈছিল তেওঁলোকৰ প্ৰথমটো প্ৰি-ৱেডিং অনুষ্ঠান, যিটো ৩ দিন ধৰি চলিছিল । এই অনুষ্ঠানত আম্বানী পৰিয়ালে বহু বলীউড তাৰকা আৰু আন্তঃৰাষ্ট্ৰীয় চেলেব্ৰিটীক আমন্ত্ৰণ জনাইছিল ।
16 জুলাইৰ সন্ধিয়া অনন্ত আম্বানী আৰু ৰাধিকা মাৰ্চেণ্ট বিয়াৰ পিচত প্ৰথমবাৰৰ বাবে জামনগৰত উপস্থিত হয় । নৱ-বিবাহিত দম্পতীক আদৰণি জনোৱাৰ বাবে জামনগৰ বিমানবন্দৰৰ বাহিৰৰ ৰাস্তা ফুলেৰে সজোৱা হৈছিল । অনন্ত আম্বানী আৰু ৰাধিকা মাৰ্চেণ্টৰ আগমনৰ বাবে বেনাৰো লগোৱা হৈছিল । তেওঁলোক দুয়োকে চহৰখনত পৰম্পৰাগত ধৰণে আদৰণি জনোৱা হয় । আদৰণি জনোৱা বহু ভিডিঅ’ এতিয়া সামাজিক মাধ্যমত বিয়পি পৰিছে ।
ভাইৰেল ভিডিঅ’ এটাত অনন্ত-ৰাধিকাক তেওঁলোকৰ বাহনত উঠি অহা দেখা গৈছে । নগৰবাসীসকলে গোলাপৰ পাহি ছটিয়াই তেওঁলোকক উষ্ম আদৰণি জনায় । উপস্থিত জনতাৰ ফালে হাত জোকাৰি সম্ভাষণ জনায় নৱ দম্পতীয়ে । ভিডিঅ’টোত ঢোল আৰু বাদ্যযন্ত্ৰৰ লগতে অনন্ত আম্বানী আৰু ৰাধিকাৰ বাবে উল্লাস কৰা শ্ল’গানো দেখা যায় ।