World Cup Trophy Replica With Chocolate : చాక్లెట్​తో ప్రపంచకప్​ తయారీ.. మొత్తం తినేయొచ్చట!

World Cup Trophy Replica With Chocolate : వన్డే ప్రపంచకప్​లో భాగంగా నేడు (అక్టోబర్​ 29)న భారత్​- ఇంగ్లాండ్ మధ్య మ్యాచ్​ జరగనుంది. ఈ క్రమంలో ఎక్కడ చూసినా ఇప్పుడు క్రికెట్​ మేనియా నడుస్తోంది. ఐదు మ్యాచ్​లు గెలిచి మంచి ఫామ్​లో ఉన్న రోహిత్​ సేన ఈ ఆరో మ్యాచ్​లోనూ విజయం సాధించాలని అభిమానులు ఆకాంక్షిస్తున్నారు. ఈ క్రమంలో పూజలు, యాగాలు చేస్తున్నారు.

మరోవైపు టీమ్ఇండియాపైనున్న అభిమానాన్ని ఫ్యాన్స్​ ఏదో ఒక రూపంలో చూపిస్తూనే ఉన్నారు. తాజాగా ఒడిశాలోని భువనేశ్వర్​కు చెందిన ఓ చెఫ్​ బృందం ఓ వినూత్న ఐడియాతో ముందుకొచ్చారు. చాక్లెట్​ను ఉపయోగించి వరల్డ్​ కప్​ నమూనాను తయారు చేశారు. అచ్చం ప్రపంచకప్​ను పోలిన ఈ నమూనా ప్రస్తుతం అందరి దృష్టిని ఆకర్షిస్తోంది.  ఏడుగురు చెఫ్​లతో కూడిన ఓ బృందం.. దాదాపు మూడు రోజులు కష్టపడి ఈ కప్​ను తయారు చేశారు. ఇందులో ఉన్న గోల్డ్​ పూత సహా అన్ని తినే పదార్థాలతోనే రూపొందించినట్లు చెఫ్​ బృందం తెలిపింది. 18 డిగ్రీల ఉష్ణోగ్రతలో చాక్లెట్​ను ఎక్కడా కూడా కరగకుండా ఉండేలా జాగ్రత్తపడుతూ ఈ నమూనాను తయారు చేశారట.