తెలంగాణ ప్రజలను కేసీఆర్​ మోసం చేశారు : విజయశాంతి

Vijayashanti Roadshow in Ibrahimpatnam : కొట్లాడి తెచ్చుకున్న తెలంగాణను.. కేసీఆర్​ నుంచి కాపాడుకునే బాధ్యత ప్రజలపైనే ఉందని కాంగ్రెస్ నేత విజయశాంతి తెలిపారు. ఎన్నికల ప్రచారంలో భాగంగా.. కాంగ్రెస్ అభ్యర్థి మల్​రెడ్డి రంగారెడ్డికి మద్ధతుగా ఇబ్రహీంపట్నంలో రోడ్​షో నిర్వహించారు. చేతి గుర్తుకే ఓటు వేసి గెలిపించాలని ప్రజలకు విజ్ఞప్తి చేశారు. 

Congress Election Campaign :  రాష్ట్రంలో కుటుంబపాలన కొనసాగుతోందని.. నలుగురు వ్యక్తుల చేతుల్లోనే అధికారం కేంద్రీకృతమయ్యిందని కాంగ్రెస్ నేత విజయశాంతి పేర్కొన్నారు. ఉద్యమ ఆకాంక్షలను సీఎం కేసీఆర్​ నీరుగార్చారని దుయ్యబట్టారు. తెలంగాణ ప్రజలను మోసం చేశారని మండిపడ్డారు. యువతకు ఉద్యోగాలు ఇవ్వటంలో బీఆర్​ఎస్​ విఫలమయ్యిందని ఆగ్రహం వ్యక్తం చేశారు. రాష్ట్రాన్ని బంగారు తెలంగాణగా మారుస్తానన్న కేసీఆర్​.. అప్పులకుప్పగా మార్చారని మండిపడ్డారు. కాంగ్రెస్ పార్టీ అధికారంలోకి రాగానే ఆరు గ్యారెంటీలను అమలు చేస్తుందన్నారు. అందరి భవిష్యత్​ మారాలంటే తెలంగాణను ఇచ్చిన కాంగ్రెస్​ పార్టీకే ఓటు వేసి గెలిపించాలని కోరారు. సబ్బండ వర్గాల సంక్షేమాన్ని దృష్టిలో ఉంచుకుని.. కాంగ్రెస్ పార్టీ​ పథకాల రూపకల్పన చేసిందన్నారు.