ఇబ్బందులు ఎదురైనా సొరంగంలో కలిసికట్టుగా కార్మికులు- వాటర్ పైప్ ద్వారా అధికారులకు సమాచారం!

Uttarakhand Tunnel Collapse Labour Viral Video : ఉత్తరాఖండ్ ఉత్తరకాశీలోని సిల్​క్యారా సొరంగంలో చిక్కుకున్న 41 మంది కార్మికులకు సంబంధించిన వీడియో తాజాగా బయటకు వచ్చింది. ఈ వీడియోను టన్నెల్​లో ఉన్న సమయంలో ఓ కార్మికుడు చిత్రీకరించారు. సొరంగంలో కార్మికులు ఏ విధమైన ఇబ్బందులు పడ్డారు? గుండె ధైర్యంతో ఎలా కలిసికట్టుగా ఉన్నారు మొదలైన విషయాలను వీడియోలో ఆ వ్యక్తి వివరించారు. ఆ వీడియో ప్రస్తుతం సోషల్ మీడియాలో వైరల్​గా మారింది.  

సొరంగ ప్రమాదంలో చిక్కుకున్న కార్మికుడు తీసిన వీడియోలో భారీ యంత్ర సామగ్రి కనిపిస్తోంది. వాటితో పాటు టన్నెల్​లో కార్మికులందరూ కలిసికట్టుగా ఉన్న దృశ్యాలు కనిపిస్తున్నాయి. ఈ వీడియోను చూస్తే సొరంగంలో కార్మికులు ఎన్ని ఇబ్బందులు ఎదురైనా వారు ధైర్యంగా ఉన్నట్లుగా కనిపిస్తోంది. కార్మికులంతా ఒకే చోట నిద్రచేసినట్లుగా తెలుస్తోంది. 

సొరంగంలో ఉన్న సమయంలో నీటిపైపుల ద్వారా తమ సమాచారాన్ని అధికారులకు తెలిపినట్లుగా ఆ ప్రమాదంలో చిక్కుకున్న సంతోష్ అనే ఓ కార్మికుడు తెలిపారు. 'సొరంగంలో పడి ఉన్న రెండు నీటిపైపుల్లో ఓ ఉత్తరం పెట్టాం. తర్వాత పైపులను బిగించి మోటర్​కు అమర్చి స్టార్ట్ చేశాం. తద్వారా నీళ్లతో పాటు ఉత్తరం కూడా బయటకు వెళ్లింది. దానిని చూసిన అధికారులు సొరంగం లోపల మేమంతా బతికి ఉన్నట్లు తెలుసుకున్నారు. ఫలితంగా అధికారులు మాకు ఆహార పదార్థాలు, ఆక్సిజన్​ పంపించారు. తద్వారా మేం 10 రోజుల పాటు ప్రాణాలతో ఉండగలిగాం' అని ఆ కార్మికుడు వివరించారు.