TDP Leaders Protest in Sangareddy : చంద్రబాబుకు మద్దతుగా సంగారెడ్డిలో టీడీపీ కార్యకర్తల ఆందోళన

TDP Leaders Protest in Sangareddy : తెలుగుదేశం పార్టీ అధినేత చంద్రబాబు నాయుడు అరెస్టును నిరసిస్తూ.. తెలంగాణ వ్యాప్తంగా టీడీపీ శ్రేణులు గత కొద్దిరోజులుగా నిరసనలు కొనసాగిస్తున్న సంగతి తెలిసిందే. ఏపీ ప్రభుత్వ వైఖరిని వ్యతిరేకిస్తూ.. తెలంగాణ టీడీపీ నేతలు పలుచోట్ల ఆందోళనలు చేస్తున్నారు. నేడు సంగారెడ్డి జిల్లా కేంద్రంలో టీడీపీ కార్యకర్తలు.. నల్ల టీషర్టులు ధరించి నిరసన వ్యక్తం చేశారు. ఏపీ సర్కార్‌ తీరును నిరసిస్తూ.. ఐటీఐ నుంచి పాత బస్టాండ్ మీదుగా హనుమాన్ దేవాలయం వరకు ద్విచక్ర వాహనాలతో ప్రదర్శన చేపట్టారు.

అనంతరం పార్థనా మందిరాల్లో ప్రత్యేక పూజలు నిర్వహించి, చంద్రబాబు ఆరోగ్యంగా బయటికి రావాలని ప్రార్థించారు. అంబేడ్కర్‌, ఎన్టీఆర్‌ విగ్రహాలకు పూలమాలలు వేసిన టీడీపీ నేతలు.. చంద్రబాబుకు మద్దతుగా నినాదాలు చేశారు. కుట్రపూరితంగా గొప్ప నాయకుడిని జైళ్లో పెట్టడం దారుణమని మండిపడ్డారు. జగన్‌ ప్రభుత్వం టీడీపీ అధినేతపై ఎన్ని కక్ష సాధింపు చర్యలకు పాల్పడినా.. ప్రజల్లో ఆయన ఆదరణ తగ్గదన్నారు. చంద్రబాబు నాయుడిపై పెట్టిన అక్రమ కేసులు ఎత్తివేయాలని డిమాండ్ చేశారు. ఈ క్రమంలోనే 'సైకో పోవాలి.. సైకిల్ రావాలి' అంటూ నినాదాలు చేశారు.