Modi Birthday Wishes : 'మోదీకి ప్రేమతో'.. నవధాన్యాలతో ప్రధాని చిత్రం.. బర్త్​డేకు స్పెషల్​ గిఫ్ట్స్​!

Modi Birthday Wishes : ప్రధానమంత్రి నరేంద్ర మోదీ 72వ పుట్టిన రోజు నేపథ్యంలో వినూత్నంగా శుభాకాంక్షలు తెలిపేందుకు సిద్ధమయ్యారు అభిమానులు. మహారాష్ట్ర పుణెకు చెందిన ఓ కళాకారుల బృందం రూపొందించిన చిత్రం ఔరా అనిపిస్తోంది. వివిధ రకాల పప్పు, ధాన్యం గింజలను ఉపయోగించి మోదీ చిత్రాన్ని గణేశ్‌ ఖరే అనే కళాకారుడి బృందం అద్భుతంగా తీర్చిదిద్దింది. ఈ చిత్రాన్ని నేలపై పరచేందుకు.. కళాకారులకు రెండు రోజులు పట్టింది. గోధుమలు, నువ్వులు, జొన్న, హలీవ్‌, మూంగ్‌, మత్కీ వంటి 60కిలోల పప్పులు, ధాన్యపు దినుసులతో ఈ చిత్రాన్ని రూపొందించారు. ప్రధాని మోదీ తన 9 ఏళ్ల పాలనలో రైతుల కోసం చాలా చేశారనీ అందుకే ఆయన పుట్టిన రోజును ఇలా జరుపుకుంటున్నామని గణేశ్‌ ఖరే చెప్పారు. వీరితోపాటు గుజరాత్​ గాంధీనగర్​కు చెందిన ఎమ్మెల్యే సైతం వినూత్నంగా శుభాకాంక్షలు తెలిపారు. రాజధానిలో ప్రధానమంత్రి సైకత శిల్పాన్ని తయారు చేయించారు మండ్వీ ఎమ్మెల్యే అనిరుధ్ దవే. దీనికోసం 150 టన్నుల ఇసుకను పఠాన్​ నుంచి తెప్పించారు. మోదీ పుట్టినరోజు వేడుకలను ఘనంగా చేసేందుకు ఏర్పాట్లు చేస్తున్నారు. మోదీ జన్మదినాన్ని వారం రోజుల పాటు చేయనున్నారు.