Lineman Rescue Pigeon Viral Video : విద్యుత్​ తీగపై చిక్కుకుని పావురం అష్టకష్టాలు.. లైన్​మ్యాన్​ రెస్క్యూ ఆపరేషన్​తో..

Lineman Rescue Pigeon Viral Video : విద్యుత్​ తీగపై చిక్కుకుని అష్టకష్టాలు పడ్డ పావురాన్ని చాకచక్యంగా కాపాడాడు ఓ లైన్​మ్యాన్​. ఈ సంఘటన కర్ణాటకలోని దక్షిణ కన్నడ జిల్లాలో జరిగింది. అందుకు సంబంధించిన వీడియో.. ప్రస్తుతం సోషల్​మీడియాలో వైరల్​గా మారింది. లైన్​మ్యాన్​ రెస్క్యూ ఆపరేషన్​ను నెటిజన్లు అభినందిస్తున్నారు.  

అసలేం జరిగిందంటే?
Pigeon Rescue Video : జిల్లాలోని కడబ నగరంలో శనివారం ఉదయం ఓ పావురం.. విద్యుత్​ తీగపై వాలింది. ఆ తర్వాత పక్షి కాలికి ఉన్న ప్లాస్టిక్​ తాడు.. విద్యుత్​ తీగకు చుట్టుకుంది. దీంతో పావురం ఎగిరేందుకు ఎంత ప్రయత్నించినా వీలు కాలేదు. సుమారు గంటన్నరగా వేలాడుతున్న పావురాన్ని గమనించిన స్థానికులు అయ్యో అంటూ ఆవేదన చెందారు. ఇంతలో ఓ వ్యక్తి.. లైన్​ మ్యాన్​ గురుమూర్తికి సమాచారం అందించాడు.

విషయం తెలుసుకున్న వెంటనే లైన్​మ్యాన్​ గురుమూర్తి.. సంఘటనాస్థలికి చేరుకుని విద్యుత్​ను నిలిపివేశాడు. విద్యుత్​ స్తంభం ఎక్కి పావురాన్ని రక్షించాడు. పావురం కాలికి ఉన్న ప్లాస్టిక్​ తాడును తీసేసి ఆకాశంలోకి ఎగురవేశాడు. గురుమూర్తి రెస్క్యూ ఆపరేషన్​ను స్థానికులు అభినందించారు.