బోల్తా కొట్టిన కారు - బయటపడిన 2 క్వింటాళ్ల గంజాయి, ఎక్కడంటే?

Ganja seized in Sangareddy : రాష్ట్రంలో గంజాయి అక్రమ రవాణా రోజురోజుకూ పెరుగుతోంది. ఈ నేపథ్యంలో పోలీసులు భద్రతను మరింత కట్టుదిట్టం చేశారు. ఈ క్రమంలోనే భద్రాచలం ఏజెన్సీ ప్రాంతాల నుంచి ముంబయి వెళ్తున్న ఓ కారులో గంజాయి పట్టుబడింది. పోలీసులు తెలిపిన వివరాల ప్రకారం సంగారెడ్డి జిల్లా జహీరాబాద్ మండలం బూచినెల్లి సమీపంలో శుక్రవారం అర్ధరాత్రి ఓ కారు బోల్తా పడింది. ప్రమాదంలో కారులో ఉన్న వారు తీవ్రంగా గాయపడగా కారును అక్కడే వదిలేసి పరారయ్యారు. ఘటనా స్థలానికి చేరుకున్న పోలీసులు కారులో భారీగా ఉన్న గంజాయి పొట్లాలను చూసి అవాక్కయ్యారు. 

Two Tonnes Ganja Seized In Sangareddy : కారులో లభ్యమైన గంజాయి సుమారు 2 క్వింటాళ్ల వరకు ఉంటుందని, దాని విలువ రూ.25 లక్షల వరకు ఉంటుందని పోలీసులు భావిస్తున్నారు. భద్రాచలం ఏజెన్సీ ప్రాంతాల నుంచి ముంబయికి గంజాయి తరలిస్తుండగా ప్రమాదం జరిగి ఉంటుందని అనుమానిస్తున్నారు. ప్రమాదానికి గురైన కారుతో సహా అందులో దొరికిన గంజాయిని చిరాగ్​పల్లి పోలీస్ స్టేషన్​కు తరలించారు. దీనిపై కేసు నమోదు చేసి, నిందితుల కోసం గాలిస్తున్నారు.