నల్గొండలో ఉద్రిక్తత, బీఆర్ఎస్ శ్రేణుల దాడిలో కాంగ్రెస్ పార్టీ వార్డు కౌన్సిలర్ భర్తకు గాయాలు

Clash Between BRS, Congress Members at Nalgonda : నల్గొండ జిల్లా కేంద్రంలోని 17వ వార్డులో ఉద్రిక్తత చోటుచేసుకుంది. బీఆర్ఎస్, కాంగ్రెస్ శ్రేణులు మధ్య ఘర్షణ వాతావరణం నెలకుంది. కొందరు వ్యక్తులు మున్సిపాలిటీ 17వ వార్డు కౌన్సిలర్ అశ్విని ఇంటిపై దాడికి పాల్పడ్డారు. ఘటనలో కౌన్సిలర్ భర్త అయిన భాస్కర్​కు స్వల్ప గాయాలు అయ్యాయి. దీనిపై సమాచారం అందుకున్న పోలీసులు ఘటనాస్థలికి చేరుకుని ఇరువర్గాలను చెదరగొట్టారు. ఇది కచ్చితంగా బీఆర్ఎస్ కార్యకర్తల పనేనని అశ్విని, ఆమె కుటుంబ సభ్యులు ఆరోపించారు.

ఈ దాడి విషయాన్ని కాంగ్రెస్ సీనియర్ నేత, ఎంపీ కోమటిరెడ్డి వెంకట్ రెడ్డి దృష్టికి తీసుకెళ్లడంతో.. ఆయన కౌన్సిలర్ ఇంటికి వెళ్లి పరామర్శించారు. జరిగిన విషయాన్ని అడిగి తెలుసుకున్నారు. ఇటీవల అశ్విని గులాబీ పార్టీ నుంచి కాంగ్రెస్​లో చేరడం వల్లనే ఈ దాడులు జరిగినట్లు బాధిత కుటుంబ సభ్యులు ఆరోపణలు చేస్తున్నారు. ప్రశాంతంగా ఉన్న నల్గొండలో ఎన్నికల వేళ జరుగుతున్న ఈ ఘటనలు పట్టణ ప్రజలను భయందోళనలకు గురుచేస్తున్నాయి.