"మిమ్మల్ని నరదిష్టి వేధిస్తోందా? - ఈ ఉంగరం ధరిస్తే ఇట్టే తొలగిపోతుంది"

-నరదిష్టితో ఇబ్బందులు పడుతున్నారా? -ఈ పరిహారాలు పాటిస్తే మేలంటున్న జ్యోతిష్య నిపుణులు

Remedies to Get Rid of Nara Dishti: నరదిష్టిని చాలా మంది నమ్ముతారు. ఇది మనిషిని అనేక విధాలుగా ప్రభావితం చేస్తుందని, ఆర్థిక, ఆరోగ్య సమస్యలకు దారితీస్తుందని భావిస్తారు. ఈ కనుదిష్టిని పోగొట్టుకునేందుకు అనేక ప్రయత్నాలు చేస్తుంటారు. కానీ ఫలితం శూన్యం. మీరు కూడా ఇలాంటి ఇబ్బందుల్లో ఉంటే, మీపై ఉన్న నరదిష్టి పోవాలంటే కొన్ని తాంత్రిక పరిహారాలు చేయాలని ప్రముఖ జ్యోతిష్య నిపుణులు మాచిరాజు కిరణ్​ కుమార్​ చెబుతున్నారు. ఆ వివరాలు ఇప్పుడు చూద్దాం.

ఎండుమిరపకాయల పరిహారం: మంగళవారం రోజు 21 ఎండుమిరపకాయలు తీసుకుని దండలా చేసి దానిని ఇంటి గుమ్మానికి వేలాడదీయాలి. ఇలా చేస్తే ఇంటికి, ఇంట్లోని కుటుంబసభ్యులపై ఉన్న భయంకరమైన కనుదిష్టి తొలగిపోతుందని మాచిరాజు చెబుతున్నారు.

బ్రహ్మ దండి తంత్రం: తాంత్రిక శాస్త్రం ప్రకారం బ్రహ్మ దండి తంత్ర పరిహారం పాటిస్తే అన్ని దిష్టి దోషాలు పోతాయని చెబుతున్నారు. ఆ పరిహారం ఎలా పాటించాలంటే, ఆదివారం రోజున బ్రహ్మజెముడు చెట్టును ఇంటికి తీసుకురావాలి. ఆ తర్వాత దానిని ఇంట్లోని ఈశాన్య మూలలో తలకిందులగా వేలాడదీయాలి. ఆపై ప్రతి శుక్రవారమూ గుగ్గిలం పొగ వేయాలి. ఈ పరిహారం చేస్తే ఇంటి సభ్యులందరిపై ఉన్న దిష్టి మొత్తం పోతుందని అంటున్నారు.

రామ మునగ చెట్టు పరిహారం: భయంకరమైన కనుదిష్టి, ఎదుటివాళ్ల ఏడుపులతో ఇబ్బందిపడుతున్న వారు రామమునగ చెట్టు పరిహారం పాటిస్తే విశేష ఫలితాలు కలుగుతాయని చెబుతున్నారు. అందుకోసం, అమావాస్య రోజు సాయంత్రం పూట ఈ రామ మునగ చెట్టును ఇంటికి తీసుకురావాలి. ఆ మర్నాడు ఉదయం ఈ చెట్టును ఇంటి గుమ్మానికి వేలాడదీయాలి. ఇలా చేయడం వల్ల ఆ చెట్టు యజమానిని రామబాణంలా కాపాడుతుందని అంటున్నారు.

నరసింహ స్వామి పూజ: ఎదుటి వాళ్ల ఏడుపులు, నరదిష్టిని పొగొట్టే శక్తి నరసింహ స్వామికి ఉంటుందని మాచిరాజు చెబుతున్నారు. అందుకోసం ప్రతీ శనివారం నరసింహ స్వామి ఆలయంలో తులసి మాల సమర్పించి, కొబ్బరికాయ కొట్టాలి. ఆ తర్వాత ఏదైనా తీపి పదార్థం లేదా పులిహోరను నైవేద్యంగా సమర్పించి, దానిని గుడి ఆవరణలో భక్తులకు పంచిపెట్టాలి.

ఏనుగు వెంట్రుక ఉంగరం: భయంకరమైన కనుదిష్టి, ఎదుటివాళ్ల ఏడుపులతో ఇబ్బందిపడుతున్న వారు ఏనుగు వెంట్రుక ఉంగరం ధరిస్తే మంచిదని మాచిరాజు కిరణ్​ కుమార్​ చెబుతున్నారు.

Note : పైన తెలిపిన వివరాలు కొందరు జ్యోతిష్య నిపుణులు, శాస్త్రంలో పేర్కొన్న అంశాల ఆధారంగా అందించినవి మాత్రమే. అంతేకానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకూ విశ్వసించాలి అనేది పూర్తిగా మీ వ్యక్తిగత విషయం.