తాలింపు అవసరమే లేదు - "టమాటా ఉల్లిపాయ రోటి పచ్చడి" - వేరే లెవల్!

రొటీన్ కూరలు తిని బోర్ కొట్టిందా? - ఈ రోటి పచ్చడి కేక!

Tomato Onion Chutney Recipe : మనలో చాలా మందికి రోటి పచ్చళ్లంటే ఎంతో ఇష్టపడతారు. ఇంట్లో ఏ కూరగాయలూ లేనప్పుడు ఏదైనా కమ్మటి రోటి పచ్చడి ఉంటే చాలు, ఆ పూట తృప్తిగా భోజనం చేసిన ఫీలింగ్ కలుగుతుంది. ఈ క్రమంలోనే ఎక్కువ మంది ప్రిపేర్ చేసుకునే వాటిలో టమాటా పచ్చడి ముందు వరుసలో ఉంటుంది. అయితే, ఎప్పుడూ ఒకే స్టైల్​లో కాకుండా ఈసారి సరికొత్తగా ట్రై చేయండి. అదే, "టమాటా ఉల్లిపాయ రోటి పచ్చడి".

వేడివేడి అన్నంలో ఈ చట్నీ వేసుకొని తింటుంటే ఆ టేస్ట్ అమోఘం అని చెప్పాల్సిందే. కేవలం అన్నంలోకే కాదు చపాతీ, ఇడ్లీ, దోశ, వడ ఇలా ఏ టిఫెన్​లోకైనా అద్భుతంగా ఉంటుంది ఈ పచ్చడి. పైగా దీనికి తాలింపు కూడా అవసరం లేదు! మరి, ఈ సూపర్ టేస్టీ పచ్చడిని ఎలా ప్రిపేర్ చేసుకోవాలో ఇప్పుడు చూద్దాం.

కావాల్సిన పదార్థాలు :

• నూనె - 5 స్పూన్లు
• మెంతులు - పావు చెంచా
• ఎండుమిర్చి - 10
• ఆవాలు - ముప్పావు చెంచా
• ఇంగువ - చిటికెడు
• కరివేపాకు - కొద్దిగా
• టమాటాలు - 2(పెద్ద సైజ్​వి)
• ఉల్లిపాయలు - 2(పెద్ద సైజ్​వి)
• పసుపు - పావుటీస్పూన్
• ఉప్పు - రుచికి సరిపడా
• చింతపండు - కొద్దిగా

తయారీ విధానం :

• ఇందుకోసం ముందుగా ఒక చిన్న బౌల్​లో చింతపండుని కొద్దిసేపు నానబెట్టుకోవాలి. అలాగే, రెసిపీలోకి కావాల్సిన టమాటాలు, ఉల్లిపాయలను ముక్కలుగా కట్ చేసుకొని పక్కనుంచాలి.
• ఇప్పుడు స్టౌపై పాన్ పెట్టుకొని 2 స్పూన్ల ఆయిల్ వేసి వేడి చేసుకోవాలి. నూనె వేడయ్యాక మెంతులు వేసుకొని బాగా వేయించుకోవాలి.
• అవి వేగాక అందులో ఎండుమిర్చి, ఆవాలు, కరివేపాకు, ఇంగువ కూడా వేసుకొని అన్నింటినీ చక్కగా వేయించుకోవాలి. ఆపై వాటిని ఒక ప్లేట్​లోకి తీసుకొని పక్కనుంచాలి.
• అనంతరం అదే పాన్​లో మరో మూడు స్పూన్ల ఆయిల్ వేసుకొని వేడి చేసుకోవాలి. నూనె వేడెక్కాక ముందుగా తరిగి పెట్టుకున్న ఆనియన్స్, పసుపు వేసి కలిపి మూతపెట్టి మీడియం ఫ్లేమ్ మీద మధ్యమధ్యలో కలుపుతూ 8 నుంచి 10 నిమిషాల పాటు మగ్గించుకోవాలి.
• ఆ తర్వాత అందులో తరిగి పెట్టుకున్న టమాటా ముక్కలు, ఉప్పు, నానబెట్టిన చింతపండు నుంచి తీసిన రసం యాడ్ చేసుకొని కలిపి మరో 5 నిమిషాల పాటు మిశ్రమాన్ని మగ్గించుకొని స్టౌ ఆఫ్ చేసుకోవాలి.
• ఇప్పుడు శుభ్రంగా కడిగి తుడుచుకున్న రోటిలో ముందుగా వేయించుకున్న ఎండుమిర్చి మిశ్రమాన్ని వేసుకొని మెత్తగా దంచుకోవాలి.
• ఆ తర్వాత అందులో మగ్గించుకున్న టమాటా ఉల్లిపాయ మిశ్రమాన్ని వేసుకొని మరీ మెత్తగా కాకుండా కాస్త కచ్చాపచ్చాగా నూరుకోవాలి.
• ఆ విధంగా రుబ్బుకున్నాక పచ్చడిని ఒక బౌల్​లోకి తీసుకొని సర్వ్ చేసుకుంటే చాలు. అంతే, ఎంతో రుచికరంగా ఉండే "టమాటా ఉల్లిపాయ రోటి పచ్చడి" రెడీ!
• అయితే రోలు, రోకలి అందుబాటులో లేనివారైతే మిక్సీలో వేసుకొని మరీ మెత్తగా కాకుండా బరకగా ఉండేలా గ్రైండ్ చేసుకుంటే సరిపోతుంది. కానీ, రోట్లో దంచుకున్నంత టేస్ట్ రాకపోవచ్చు!