రోగాలు నయం చేసే వైద్యులు ఎంత గొప్పవారో, పరిసరాల శుభ్రతకు పాటుపడే కార్మికులూ అంతే గొప్ప : హరీశ్​రావు

BRS MLA Harish Rao on Siddipet Municipality : రోగం వస్తే నయం చేసే వైద్యులు ఎంత గొప్పవారో, పరిసరాల శుభ్రతకు పాటుపడే మున్సిపల్ కార్మికులూ అంతే గొప్పవారని మాజీ మంత్రి హరీశ్​రావు పేర్కొన్నారు. సిద్దిపేట పట్టణానికి స్వచ్ఛ అవార్డు రావడం పట్ల ఆయన హర్షం వ్యక్తం చేశారు. ఈ సందర్భంగా మున్సిపల్​ కార్మికులకు కొత్త బట్టలను బహూకరించి సన్మానించారు. అనంతరం హరీశ్​రావు మాట్లాడుతూ మన చుట్టు పక్కల పరిసరాలను శుభ్రంగా ఉంచుకోవాల్సిన బాధ్యత ప్రజలందరిపై ఉందన్నారు. ప్రతి ఒక్కరూ పరిశుభ్రత పట్ల అవగాహన కలిగి ఉండాలని సూచించారు.

Siddipet Municipality Got Swachh Award : సిద్దిపేటకు ఈ స్వచ్ఛ అవార్డు రావడం ఒక్క రోజులో పడిన శ్రమ కాదని, 15 ఏళ్ల కష్టం ఫలితంగా వచ్చిందన్నారు. దక్షిణ భారతదేశంలో సిద్దిపేటకు స్వచ్ఛ అవార్డు వచ్చినప్పటికీ, రాష్ట్ర ప్రభుత్వం నుంచి ఒక చిన్నపాటి అభినందనకు నోచుకోకపోవడం బాధాకరమన్నారు. ప్రజలు, కార్మికుల సహకారంతో ఈ అవార్డు వచ్చిందన్నారు. సిద్దిపేట పట్టణానికి ఇప్పటి వరకు 22 అవార్డులు వచ్చాయని తెలిపారు. పట్టణ పరిశుభ్రతలో దేశంలోని 4,477 మున్సిపాలిటీల్లో 9వ స్థానం, దక్షిణ భారతదేశంలో మొదటి స్థానంలో సిద్దిపేటకు క్లీన్ సిటీ అవార్డ్ వరించిందన్నారు.