ఓటు విషయంలో తగ్గేదేలే అంటోన్న వందేళ్ల బామ్మ - ఈమెను చూసైనా

104 Year Old Woman to Vote in Telangana Elections 2023 : ఓటు.. హాఁ.. ఈ ఒక్కసారి వేయకుంటే ఏం అవుతుందిలే అనుకునే వారు చాలా మందే ఉంటారు. నేను వేసే ఒక్క ఓటు అభ్యర్థుల గెలుపోటములను నిర్ణయించేస్తుందా ఏంటి అని నిట్టూర్చే వారూ లేకపోలేదు. కానీ వందేళ్ల వయసులోనూ.. తన బాధ్యతను నిర్వర్తించడంలో తగ్గేదే లే అంటోంది ఓ బామ్మ. ఈసారి ఎన్నికల్లో ఓటు హక్కును వినియోగించుకునేందుకు ఇప్పటికే ఏర్పాట్లు చేసుకుని గ్రామస్థులతో పాటు అందరికీ ఆదర్శంగా నిలుస్తోంది. ఆమే నిర్మల్ జిల్లా భైంసా పట్టణంలోని పురానా బజార్​కు చెందిన 104 ఏళ్ల చివాటే అన్నపూర్ణ బాయి. 

Home Voting in Telangana Assembly Elections : 1957 నుంచి మొదలుకొని.. ఇప్పటి వరకు జరిగిన ప్రతి ఎన్నికలో తన ఓటు హక్కు వినియోగించుకుంటూ వస్తున్నారు. ప్రస్తుతం ఈ బామ్మ నడవలేని పరిస్థితుల్లో ఉన్నా.. రాష్ట్రంలో తొలిసారి అందుబాటులోకి వచ్చిన హోమ్​ ఓటింగ్​ విధానంలో ఓటు హక్కు వినియోగించుకునేందుకు దరఖాస్తు చేసుకున్నట్లు కుటుంబసభ్యులు తెలిపారు. అధికారులు సైతం ఇందుకు తగిన ఏర్పాట్లు చేస్తున్నారు. ఈ వయసులోనూ ఓటు వేసేందుకు ఆసక్తి చూపుతున్న ఈ బామ్మను చూసి మిగతా వారు స్ఫూర్తిగా తీసుకోవాలని అధికారులు సూచిస్తున్నారు.