ఇల్లు తళతళా మెరిసిపోవాలా? కెమికల్​ లిక్విడ్స్​ వద్దు - ఇంట్లోనే తయారు చేసుకోండిలా!

Natural Cleaners for House Cleaning: ఇంటిని శుభ్రం చేయడానికి మార్కెట్లో రకరకాల లిక్విడ్స్, క్లీనర్స్ ఉన్నాయి. అయితే.. వాటిద్వారా ఇన్​సైడ్ పొల్యూషన్ పెరిగిపోతోందని నిపుణులు హెచ్చరిస్తున్నారు. మరి.. ఈ క్లీనర్లను మనమే ఇంట్లో సహజంగా తయారు చేసుకుంటే ఎలా ఉంటుంది?

How to Make Natural Cleaners for House Cleaning: ఇంటిని శుభ్రం చేయాలంటే.. గతంలో ఫ్లోర్​ను నీళ్లతో కడిగేవారు. కానీ.. ఇప్పుడు లెక్కలేనన్ని క్లీనర్లు, లిక్విడ్స్ మార్కెట్లోకి వచ్చేశాయి. అయితే.. వాటిలోని రసాయనాలు మన ఆరోగ్యానికి చేటు చేస్తాయి. పసిపిల్లలుంటే మరీ ఇబ్బంది పడాలి. కాబట్టి.. కెమికల్ క్లీనర్స్​తో జాగ్రత్తగా ఉండాలని నిపుణులు సూచిస్తున్నారు. మరి, ఇప్పుడు ఏం చేయాలి అంటారా? ఇంట్లోనే సహజంగా క్లీనర్స్​ తయారు చేసుకోండి అంటాం! "మాకు తెలియదు" అంటారా..? ఈ ఆర్టికల్ చదివితే సరిపోతుంది అంటాం..!

కిచెన్​: వంటగదిలో పొయ్యి, టైల్స్‌, కిటికీ అద్దాలు కొన్ని రోజులకే మురికిగా, జిడ్డు పట్టినట్టుగా తయారవుతాయి. వీటిని శుభ్రం చేయడానికి.. పావు కప్పు వెనిగర్‌, చెంచా బేకింగ్‌సోడా, రెండు కప్పుల నీరు కలిపి లిక్విడ్‌లా తయారు చేసుకోవాలి. ఈ మిశ్రమాన్ని స్ప్రే బాటిల్లో వేసి జిడ్డు ఉన్నచోట చల్లి అరగంట తర్వాత శుభ్రం చేస్తే సరి. ఈ మిశ్రమంలోనే కొద్దిగా నిమ్మనూనె కూడా కలిపితే శుభ్రతతోపాటు, ఇల్లు మంచి స్మెల్​ కూడా వస్తుంది.

ఓవెన్​: ఆహార పదార్థాలను మైక్రో ఓవెన్‌లో వేడి చేసే క్రమంలో.. లోపల ఆయిల్​ ఫుడ్స్​ పడి ఓవెన్‌ జిడ్డుగా మారుతుంది. ఆ మరకలు పోవాలంటే.. కప్పు వెనిగర్‌కి, కొద్దిగా నిమ్మరసం కలిపి స్ప్రే చేసి మూడు నిమిషాలు వదిలేయండి. తర్వాత శుభ్రం చేస్తే మురికి, వాసన తొలగిపోతాయి. రెండు వారాలకోసారి ఇలా చేస్తే ఓవెన్‌ శుభ్రంగా ఉంటుంది.

కార్పెట్లు, డోర్​మ్యాట్స్: కార్పెట్లు, డోర్​ మ్యాట్​లు శుభ్రం చేయడానికి పావుకప్పు వెనిగర్‌కి చెంచా మొక్కజొన్న పిండి(కార్న్​ ఫ్లోర్​), పావు కప్పు నీరు చేర్చి బాగా గిలకొట్టాలి. ఈ మిశ్రమాన్ని కార్పెట్ల మీద చల్లి ఐదు నిమిషాలు ఉంచాలి. తర్వాత వాక్యూమ్‌ క్లీనర్‌తో శుభ్రం చేయాలి. సువాసన కోసం దానిలో కొద్దిగా లావెండర్‌ నూనె కలిపి చూడండి. చక్కని పరిమళం ఇల్లంతా వ్యాపిస్తుంది.

రూమ్​ స్ప్రే: చెంచా కాఫీపొడి, గుప్పెడు పుదీనా ఆకులు, చెంచా బేకింగ్‌సోడా, కాసిని నిమ్మతొక్కలు, కొద్దిగా నిమ్మరసం.. ఒక గిన్నెలో వేసి ఒక మూలన ఉంచితే గది అంతా పరిమళం వ్యాపిస్తుంది. లేదా వీటన్నింటిని కలిపి నీటిలో వేసి గదిలో స్ప్రే చేసినా సరిపోతుంది.

బాత్రూమ్: ముప్పావుకప్పు చొప్పున వంటసోడా, వెనిగర్‌ వేసి దీనిలో కొన్ని చుక్కల లావెండర్‌ నూనె, టీట్రీ ఆయిల్‌ వేసి కలపాలి. ఈ మిశ్రమంతో బాత్రూం శుభ్రం చేస్తే మెరవడమే కాదు.. చెడువాసనలూ దూరం అవుతాయి. ఈ టిప్స్​ ఫాలో అయ్యి.. వందల వందలు ఖర్చు లేకుండా సహజమైన క్లీనర్లను తయారుచేసి ఉపయోగించండి.