హ్యాంగోవర్​కు ఆయుర్వేదంతో చెక్!

సంతోషమొచ్చినా.. బాధొచ్చినా.. స్నేహితులు కలిసినా.. శత్రువు కనిపించినా.. ఆఖరికి శిశువు పుట్టినా.. తెలిసినవాళ్లు గిట్టినా.. ఆ భావోద్వేగాన్ని వ్యక్తం చేయాలంటే మందే మార్గంగా ఎంచుకుంటున్నారు నేటి తరం. ఎప్పుడు పడితే అప్పుడు, ఎంతపడితే అంత తాగడం వల్ల భవిష్యత్తులో ఆరోగ్యం చెడిపోతుందనే సంగతి అటుంచితే.. మరుసటి రోజు వచ్చే హ్యాంగోవర్​ను అధిగమించడం చాలా కష్టం. మరి ఆ హ్యాంగోవర్​ను ఎలా తరిమికొట్టాలో చూసేద్దాం రండి...

సరైన సమయంలో, సరైన మోతాదులో ఆల్కహాల్ తీసుకోవడం వల్ల పెద్ద ప్రమాదమేమీ లేదు. కానీ, మోతాదుకు మించి తీసుకుంటేనే ఆరోగ్యానికి దీర్ఘకాలిక హాని కలుగుతుంది. శ్రుతిమించి తాగితే మన శరీరం మరుసటి రోజే మనకు చెప్పేస్తుంది. దీనినే ఆంగ్లంలో హ్యాంగోవర్ అంటారు. హ్యాంగోవర్ వల్ల మానసిక, భౌతిక ఆరోగ్యంపై తీవ్ర ప్రభావం ఉంటుంది.

ఎలాంటి జాగ్రత్తలు తీసుకోవడం వల్ల హ్యాంగోవర్ నుంచి బయటపడొచ్చో ఈటీవీ భారత్​తో పంచుకున్నారు ఆంధ్రప్రదేశ్​కు చెందిన ఆయుర్వేద నిపుణులు డాక్టర్ నిర్మలా దేవి. అవేంటో చూసేయండి..

మదత్యయా లేదా ఆల్కహాలిజాన్ని లక్షణాల ఆధారంగా నాలుగు విధాలుగా వర్గీకరించారు. పానాత్యయం (అధిక మద్యపానం వల్ల తీవ్రమైన మత్తు), పరమద (హ్యాంగోవర్), పానాజీర్ణ(పొట్టలో పుండ్లు), పానవిభ్రమ( దీర్ఘకాలిక మద్యపానం).... ఇందులో పరమదను అధిగమించాలంటే దాని లక్షణాలు ముందుగా తెలుసుకోవాలి...

హ్యాంగోవర్ లక్షణాలు..

పరమద లేదా హ్యాంగోవర్ అంటే.. రాత్రి తాగిన మద్యం ప్రభావం మరుసటి రోజు ఉదయం కనిపించడం. ఉదాహరణకు..

• కళ్లు ఎర్రగా మారడం
• అధిక దాహం
• తలనొప్పి
• కాంతి, ధ్వనిని భరించలేకపోవడం
• దుర్వాసన (హాలిటోసిస్)
• అధిక లాలాజలం
• ఏకాగ్రత లేకపోవడం
• అలసట, ఆందోళన
• చిరాకు
• వేగవంతమైన హృదయ స్పందన
• మైకం
• వికారం, వాంతులు లేదా విరేచనాలు
• వణుకు వంటి లక్షణాలు కనిపిస్తే.. అది మత్తుతో వచ్చిన చిక్కే అనుకోవచ్చు.

ఎలా అధిగమించాలి..?

• హ్యాంగోవర్ నుంచి పూర్తిగా బయటపడాలంటే.. మద్యం మానేయాలి. లేదా మితంగా తాగాలి. తాగిన మద్యాన్ని జీర్ణం చేసేందుకు శరీరానికి కాస్త సమయం ఇవ్వాలి. అయితే, ఎన్ని చేసినా హ్యాంగోవర్ పూర్తిగా వదిలించుకోలేము. కేవలం, దాని లక్షణాలను మాత్రమే తగ్గించుకోవచ్చు అంటున్నారు డాక్టర్ దేవీ.
• నీరు ఎక్కువగా తీసుకోవడం, విశ్రాంతి, పోషకాహారం ద్వారా హ్యాంగోవర్ లక్షణాలను అధిగమించొచ్చు. ఇంకా ఆయుర్వేద చిట్కాలు పాటించవచ్చు.

ఖర్జూర మంథ

ఖర్జూర మంథ ఓ సంప్రదాయ కషాయం. ఖర్జూర మంథ తాగడం వల్ల శరీరానికి తక్షణ శక్తి లభిస్తుంది. హ్యాంగోవర్​ పోతుంది.

ఖర్జూర మంథ తయారీ

• ఎండు ఖర్జూరాలు, చింతపండు, ఎండు ద్రాక్షలను 4 గంటల పాటు నానబెట్టాలి.
• బాగా నానిన వాటిని మెత్తటి గుజ్జులా రుబ్బుకోవాలి.
• ఈ ఖర్జూర మిశ్రమంలో 1:4 నిష్పత్తిలో నీళ్లు కలిపి తాగేయాలి.
• ఉదయం సాయంత్రం 100 మి.లీ. చొప్పున తాగితే హ్యాంగోవర్ తగ్గే అవకాశం ఉంటుంది.

ఆయుర్వేదంలో ఫలత్రికది క్వాథ్ చూర్ణ, అష్టాంగ లవణ, ఏలాది మోదక, మహా కళ్యాణక ఘృత, పునర్నవాది ఘృత, బృహత్ ధాత్రి తైలం వంటి ఔషధాలు హాంగోవర్​ను తగ్గించగలవు. అయితే, వీటిని తీసుకునే ముందు నిపుణుల సలహా తీసుకోవడం తప్పనిసరి.

ఇదీ చదవండి: వదనం మధురం.. మచ్చలు దూరం!