పెరుగు తింటే బరువు తగ్గుతారా?.. ఇందులో నిజమెంత?

Curd Benefits For Weight Loss : బరువు తగ్గడానికి చాలా మంది రకరకాల డైటింగ్​లు చేస్తుంటారు. కడుపు మాడ్చుకొని లేనిపోని కొత్త రోగాలు కొని తెచ్చుకుంటారు. దీని బదులు ఆరోగ్యకరమైన ఆహారాన్ని మితంగా తీసుకుంటూ వ్యాయాయం చేయడం ఉత్తమమని ఆరోగ్య నిపుణులు అంటున్నారు. రోజువారీ భోజనంలో పెరుగు లాంటి మంచి ఆహార పదార్థాలను తప్పకుండా చేర్చుకోవాలని సూచిస్తున్నారు. మరి.. పెరుగు తినడం వల్ల కలిగే ప్రయోజనాలు ఏంటో ఇప్పుడు తెలుసుకుందాం..

Curd Benefits For Weight Loss : జీవన శైలి సరిగా లేకపోవడం వల్ల అనేక రకాల కొత్త రోగాలు పుట్టుకొస్తున్నాయి. ఉరుకుల పరుగుల జీవితంలో చాలా మంది ఫాస్ట్ ఫుడ్​కు అలవాటు పడ్డారు. ఇంటి భోజనం కంటే క్షణాల్లో తయారయ్యే ఆహారం వైపు మొగ్గు చూపుతున్నారు. అదే సమయంలో వ్యాయామం కూడా చేయడం లేదు. దీని వల్ల ఊబకాయం లాంటి సమస్యలను ఎదుర్కొంటున్నారు. అయితే బరువు పెరగడం సులువే, కానీ తగ్గడం చాలా కష్టమని గ్రహించాలి. అందుకు జిమ్​లో వర్కవుట్లు చేస్తూ చెమటోడిస్తే సరిపోదు.. తినే భోజనం విషయంలోనూ తగిన జాగ్రత్తలు తీసుకోవాలి.

మెండుగా పోషకాలు
పాలు, పెరుగు, నెయ్యి లాంటి సంప్రదాయ ఆహార పదార్థాలను ఈ రోజుల్లో చాలా మంది తీసుకోవడం తగ్గించేశారు. బరువు పెరుగుతామనే అపోహ వల్ల కావొచ్చు.. వీటిని చాలా మంది రోజువారీ భోజనంలో చేర్చుకోవడం లేదు. అయితే పెరుగు లాంటి పోషకాలు ఎక్కువగా కలిగిన పదార్థాలను తరచూ భోజనంలో భాగం చేసుకోవాలని ఆరోగ్య నిపుణులు సూచిస్తున్నారు. పెరుగులో కార్బొహైడ్రేట్, కొవ్వు తక్కువగా ఉంటుంది. శరీరానికి బలాన్నిచ్చే ప్రొటీన్లు పుష్కలంగా ఉంటాయి. పెరుగు వల్ల బరువు పెరుగుతామనే అపోహను పక్కనపెట్టాలని.. దీన్ని రోజూ తీసుకుంటే ఊబకాయం నుంచి బయట పడొచ్చని నిపుణులు చెబుతున్నారు.

మధుమేహ నియంత్రణకు బెస్ట్
పెరుగులో కాల్షియం, ప్రొటీన్​తో పాటు విటమిన్ బీ10, విటమిన్ బీ2, పొటాషియం, మెగ్నీషియం పుష్కలంగా ఉంటాయి. శరీరానికి మేలు చేసే మంచి బ్యాక్టీరియా పెరుగులో మెండుగా ఉంటుంది. ఇది రోగనిరోధక శక్తిని పెంచి, ఆరోగ్య సమస్యలను మటుమాయం చేస్తుంది. తరచూ పెరుగు తీసుకునే స్త్రీలలో వెజైనల్ ఈస్ట్ ఇన్ఫెక్షన్లు వచ్చే అవకాశాలు కూడా తక్కువని పలు పరిశోధనలు చెబుతున్నాయి. పెరుగులోని పోషకాలు శరీరంలోని కణాలు నీటిని త్వరగా పీల్చుకునేలా చేస్తాయి. దీని వల్ల మూత్రాశయం పనితీరు మెరుగుపడుతుంది. అలాగే రక్తంలో చక్కెర స్థాయులు కూడా తగ్గుతాయి. మధుమేహ నియంత్రణలో పెరుగు చక్కగా పనిచేస్తుంది.

పెరుగును రోజూ ఉదయం పూట అల్పాహారంలో తీసుకోవచ్చు. కప్పు పెరుగులో కీర దోసకాయలు, అరటి పళ్లు, యాపిల్ లేదా నారింజ పళ్లను కలుపుకుని సలాడ్ చేసుకుని తినొచ్చు. ఇందులో మరింత రుచి కోసం తేనెను కలిపి తీసుకోవచ్చు. బరువు తగ్గాలంటే పెరుగులో బాదంపప్పులను కలిపి తీసుకుంటే చాలు. దీని వల్ల తక్కువ వ్యవధిలో బరువు తగ్గొచ్చని ఆరోగ్య నిపుణులు సూచిస్తున్నారు. రోజూ పెరుగు తింటే జీర్ణవ్యవస్థ పనితీరు బాగా మెరుగుపడుతుంది. దీని వల్ల పొట్టలో ఇన్ఫెక్షన్లు రాకుండా ఉంటాయి. ప్రతిరోజూ పెరుగును తీసుకునే వారిలో గుండె సంబంధిత సమస్యలు నియంత్రణలో ఉంటాయి. పెరుగు తినడం వల్ల అధిక రక్తపోటు కూడా అదుపులో ఉంటుంది.

ఇవీ చదవండి : ఫలరాజు 'మామిడి' ప్రయోజనాలు తెలుసా?.. ఊబకాయానికి చెక్ పెట్టొచ్చట​!