యాదాద్రి భువనగిరి కలెక్టరేట్ వద్ద జరిగిన రోడ్డు ప్రమాదంలో ఎంతో భవిష్యత్ ఉన్న ఇంజినీరింగ్ విద్యార్థులు దుర్మరణం చెందడం అందరినీ కలచివేసింది. మృతుల కుటుంబాల్లో తీరని వేదనని మిగిల్చింది. ప్రమాదంలో రవి కిరణ్, కార్తిక్, వెంకటేశ్ అక్కడికక్కడే మృతి చెందగా... ఆసుపత్రికి తరలిస్తుండగా కల్యాణ్ రెడ్డి మరణించాడు.
మృతుల వివరాలు...
మృతుల్లో రవికిరణ్ కుటుంబం మల్కాజిగిరిలోని ఇందిరానగర్లో నివసిస్తోంది. రవి కిరణ్ తండ్రి 12 ఏళ్ల క్రితం రోడ్డు ప్రమాదంలో మృతి చెందగా, రవి కిరణ్ తల్లి ప్రైవేట్ టీచర్గా పనిచేస్తూ కుమారుడు, కూతురును కష్టపడి చదివిస్తోంది. కుమారుడు తమ కుటుంబానికి ఆసరాగా నిలబడతాడనుకుంటే మృత్యువు కబళించిందని బంధువులు కన్నీటి పర్యంతమయ్యారు.
గోరుకంటి కార్తిక్... ఘట్కేసర్ మండలం కొండాపురం గ్రామం కాగా... కుటుంబ సభ్యులందరూ సమీప బంధువుల ఇంట్లో వివాహానికి వెళ్లారు. కార్తిక్ను కూడా వివాహానికి రమ్మని పిలవగా మిత్రుని సోదరి వివాహానికి వెళ్తానని చెప్పి వెళ్లి మృత్యువాత పడ్డాడు. తమతో పాటు బంధువుల ఇంట్లో వివాహానికి వచ్చి ఉంటే కార్తిక్ ప్రాణాలు నిలబడేవని కుటుంబ సభ్యులు కన్నీరుమున్నీరయ్యారు.
పన్నాల కల్యాణ్ రెడ్డిది నిజామాబాద్ జిల్లా జక్రాన్ పల్లి మండలం కొల్లిపాక గ్రామం. ఘట్కేసర్లో ప్రైవేట్ హాస్టల్లో ఉంటూ చదువుకుంటున్నాడు. తండ్రి వ్యవసాయం చేస్తూ కల్యాణ్ రెడ్డిని, చిన్న కుమారుడిని చదివిస్తున్నాడు. చింతల వెంకటేశ్... తండ్రి కుషాయిగూడలో ఓ చిన్న షాపు నిర్వహించుకుంటూ వెంకటేశ్ని చదివిస్తున్నాడు.
మధ్యతరగతి వారు...
వీరంతా మధ్యతరగతి, దిగువ మధ్య తరగతికి చెందిన వారే. ఈ ప్రమాదంలో గాయపడిన హర్షవర్ధన్ ప్రస్తుతం తార్నాక ఆర్టీసీ ఆసుపత్రిలో చికిత్స పొందుతుండగా... సాయికిరణ్ హైదరాబాద్లోని కామినేని ఆస్పత్రిలో చికిత్స పొందుతున్నారు. అఖిల్ రెడ్డి స్వల్ప గాయాలతో బయటపడ్డాడు. ఆసుపత్రి మార్చురీ వద్ద మృతుల స్నేహితులు వచ్చి రవికిరణ్, కల్యాణ్ రెడ్డి, కార్తిక్, వెంకటేశ్లతో తమ అనుబంధాన్ని గుర్తు చేసుకుని బాధపడ్డారు.
ఇదీ చూడండి: మూడు వాహనాల బీభత్సం... నలుగురు యువకుల దుర్మరణం
