వరంగల్ అర్బన్ జిల్లా హన్మకొండలో మాజీ ప్రధాని పీవీ నరసింహారావు శతజయంతి ఉత్సవాలు ఘనంగా జరిగాయి. హన్మకొండ బస్టాండ్ వద్ద ఉన్న పీవీ విగ్రహానికి పంచాయతీరాజ్ శాఖ మంత్రి ఎర్రబెల్లి దయాకర్ రావు పూలమాలలు వేసి నివాళులు అర్పించారు.
పీవీ బహుముఖ ప్రజ్ఞాశాలి, బహుభాషా కోవిదుడు అని మంత్రి ఎర్రబెల్లి దయాకర్ కీర్తించారు. కాంగ్రెస్ ప్రభుత్వం పీవీని గుర్తించలేదని... ముఖ్యమంత్రి కేసీఆర్ నేతృత్వంలో శతజయంతి వేడుకలను ఏడాది పాటు ఘనంగా నిర్వహించామని తెలిపారు. ఆయన పుట్టిన ఊరు, పెరిగిన ఊరును అభివృద్ధి చేస్తున్నామని వెల్లడించారు. తాను పీవీ శిష్యుడినని పేర్కొన్నారు.
ఈ కార్యక్రమంలో ప్రభుత్వ చీఫ్ విప్, వరంగల్ పశ్చిమ ఎమ్మెల్యే వినయ భాస్కర్, జిల్లా కలెక్టర్ రాజీవ్ గాంధీ, హుస్నాబాద్ ఎమ్మెల్యే సతీశ్ తదితరులు పాల్గొన్నారు. వీరితో పాటు కాంగ్రెస్ పార్టీ వరంగల్ అర్బన్ జిల్లా అధ్యక్షుడు నాయిని రాజేందర్, కాంగ్రెస్ శ్రేణులు హజరయ్యారు. పీవీ విగ్రహానికి పూలమాలలు వేసి నివాళులు అర్పించారు.
ఇదీ చదవండి: 'పీవీ.. తెలంగాణ నేల సృష్టించిన అద్భుత మేధస్సు'
