గర్భిణీకి అంబులెన్సులోనే సిబ్బంది ప్రసవం చేసిన సంఘటన వరంగల్ గ్రామీణ జిల్లాలో జరిగింది. పర్వతగిరి మండలం దేవీలాల్‌ తండాకు చెందిన ధరావత్‌ శిరీషకు పురిటి నొప్పులు రావడంతో 108 అంబులెన్సుకు ఫోన్‌ చేశారు. వర్ధన్నపేట అంబులెన్సు సిబ్బంది శిరీషను ఆస్పత్రికి తరలిస్తుండగా.. మార్గమధ్యలో పురిటి నొప్పులు తీవ్రమయ్యాయి.
అప్రమత్తమైన అంబులెన్సు సిబ్బంది జాగ్రత్తలు పాటిస్తూ పండంటి ఆడబిడ్డకు పురుడు పోసింది. అనంతరం వరంగల్ ఆస్పత్రికి తరలించారు. ప్రస్తుతం తల్లీబిడ్డ క్షేమంగా ఉన్నట్లు వైద్యులు వెల్లడించారు. సరైన సమయానికి స్పందించిన అంబులెన్సు సిబ్బంది రవితేజ, రాజును ఆసుపత్రి సిబ్బంది, గర్భిణీ బంధువులు అభినందించారు.
